Bakıda lüks avtomobil İTV-nin maşınına çırpıldı –

Bu gün səhər saatlarında Bakıda ağır yol qəzası baş verib. Lent.az xəbər verir ki, saat 09 radələrində Nərimanov rayonu ərazisində keçmiş Teymur Əliyev, hazırki Məmməd Araz küçəsində (Milyonerlər məhəlləsi kimi tanınan küçə) “Chevrolet Camaro” ilə İctimai Televiziyaya məxsus avtomobil toqquşub.

20 yaşlı Musa Həşimovun idarə etdiyi “Chevrolet Camaro” markalı, 99 LS 715 dövlət qeydiyyat nişanlı avtomobil İTV telekanalına məxsus “Shkoda” markalı, 10 PK 506 nömrəli maşına çırpılandan sonra yol kənarında dayanmış 1979-cu il təvəllüdlü İsmayılov Kənan Mübariz oğlunu vurub.

Hadisə nəticəsində İTV-nin sürücüsü ilə digər əməkdaşı, eləcə də “Chevrolet Camaro”nun sürücüsü xəstəxanaya aparılıb. Onlara tibbi yardım göstərildikdən sonra evə buraxılıblar. Yol kənarında dayandığı zaman bədbəxt hadisə ilə üzləşən Kənan İsmayılovun isə xəsarəti daha ağır olub. Onun sağ ayağı pəncə hissədən kəsilib.

Faktla bağlı Nərimanov rayon Polis İdarəsində araşdırma aparılır.