“Şəki Xan Klub” restoranının sahibi: "CAMMATIN KAYFINI POZA BİLMƏRƏM"
Bu restoranın sahibi kimdirsə, hətta Yasamal Rayin İcra Hakimiyyətinin “Şöhrət” ordenli başçısı İbrahim Mehdiyev də ondan qorxur. Çünki restoran sahibinin qanunsuz əməllərindən, özbaşınalığından, ətrafda yaşayan sakinləri təmiz havadan və günəş işığından məhrun etməsi barədə 3 dəfə İbrahim Mehdiyevə, 3 dəfə də Bakı Şəhər İcra Hakimiyyətinin başçısı Hacıbala Abutalıbova rəsmi müraciət ediblər. Bakı Şəhər İcra Hakimiyyətinin başçısı da sakinlərin ərizəsini “tədbir görülmək” üçün Yasamal Rayon İcra Hakimiyyətinə göndərib. Demək, Hacıbala müəllim də sakinləri başından etmək üçün ərizələri Yasamal Rayon İcra Hakimiyyətinə göndərib. Daha H.Abutalıbov fikirləşmir ki, sakinlər ona 3-cü dəfədir ki, müraciət edirlər. Əgər Yasamal Rayon İcra Hakimiyyətinin rəhbərliyi tədbir görsəydi, daha sakinlər niyə 3-cü dəfə Hacıbala müəllimə müraciət edirdilər?
Üst-sütə 6 şikayət ərizəsindən sonra Süleyman Tağızadə 41-də yaşayan sakinlərə özlərini Yasamal Rayon İcra Hakimiyyətinin işçisi kimi təqdim edən 2 nəfər gəlib problemlə yerində tanış olub. Və təəccüblə deyiblər ki, belə də özbaşınalıq olar? Restoran sahibi sakinləri günəş işığından, təbii havadan məhrum ediblər. Üstəlik sakinlərin pəncərəsinin qarşısına elektrik naqilləri çəkiblər. Sabah sakinlərdən kimisə tok vursa, məsuliyyəti kim daşıyacaq? Görəsən yaşayış evlərinin tən ortasında restoran tikməyə hansı icra hakimiyyəti orqanı icazə verib? Axı burada bişirilən yeməklərin qoxusundan, restorana gələn maşınların səsindən, tüstüsündən, ən acınacaqlı isə buraya gətirilən qadınların səs-küyündən, əcaib səslərindən yaşamaq qeyri-mümknüdür. Görəsən insanların yaşayış hüququnu əlindən alan kimdir?
İcra hakimiyyətinin işçiləri bu barədə ciddi tədbir görüləcəyini deyib gediblər. Onların gəlişindən 3 ay keçsə də, heç nə dəyişməyib. Dəyişən bir o olub ki, restoran sahibinin ürəyinə bir qədər “mərhəmət” gəlib və ətrafda yaşayan sakinlərin pəncərələrinin qarşısına vurdurduğu taxtaları sökdürüb yerinə boz rəngli plastmas vurdurub. Sonr da lağla deyib ki, yazıqdırlar, qoy pəncərələri bir az mədəni görünsün. Xalqımız dözümlü xalqdır. Qonşular təbii hava almasalar da olar. Burada bişirilən yeməklərin qoxusundan danışan restoran sahibi yenə də sakinləri ələ salıb və deyib ki, onların pulu haradadır ki, gedib kabab yesinlər. Heç olmasa qoy hər gün kababın iyini duysunlar və gözlərinin qurdu ölsün.
Axşam saat 12-dən sonra ətrafı bürüyən qadınların əcaib səslərinə isə restoran sahibi deyib ki, cammatın əyləncəsini, kayfını poza bilmərəm. Bu sözləri hər hansı bir erməni desəydi, dözmək olardı. Fikirləşərdik ki, erməni xalqımızın düşmənidir. Ancaq azərbaycanlının öz millətinə belə zülm etməsi dözülməzdir. Axı hansı ölkədə yaşayış məhəlləsinin tən ortasında, insanların sıx yaşadığı bir ərazidə restoran və ya ictimai-iaişə obyekti açırlar? Yaşayış məhəlləsinin tən ortasında əxlaqsız qadınlarla eyş-işrət məclisləri təşkil etmək milli dəyərlərimizə, əxlaqımıza və azərbaycanlı adına ləkədir. Təəssüf ki, bu gün belə əxlaqsızlıqlarla hələ də üzləşirik, özü də dövlət məmuru səviyyəsində... Pəncərələrin qarşısına vurulmuş taxtaları söküb yerinə boz rəngli plastmas vuran restoran işçilərinə etiraz edən sakinlərə deyiblər ki, müdir bizə belə tapşırıq verib. Tapşırıb ki, kim buna etiraz etsə, deyin ki, gedin Allahınıza şükür edin ki, bunu edirik. Bir də səs-küy salsanız, pəncərələrinizin qarşısını kərpiclə hörəcəyik.
Əlacları hər yerdən kəsilmiş sakinlər Prezident Administrasiyasına gedib dərdlərini demək istəyirlər. Öyrənmək istəyirlər ki, görəsən “Şəki Xan Klub” restoranının sahibi hansı dövlət məmurudur ki, həm Bakı Şəhər İcra Hakimiyyətinin rəhbərliyi, həm də Şöhrət” ordenli Yasamal Rayon İcra hakimiyyətinin başçısı İbrahim Mehdiyev ondan qorxur?
Prezident isə hər bir vətəndaşın Prezidentidir, yəqinki “Şəki Xan Klub” restoranının sahibi kimdirsə, Prezidentin "Mən xalqın birinci xidmətçisiyəm, dövlət məmuru da xalqın xidmətçisidir" fikrinə zidd gedə bilməyəcək və sakinlərə verdiyi zülmə son qoyacaq.
