Artıq bir neçə aydır Azərbaycan mətbuatında Ukraynada yaşayan iş adamı Nazim Qəzənfərovun şəriki Məhərrəm Novruzov tərəfindən aldadılaraq əmlakının əlindən alınması haqqında məlumatlar yayılır. N.Qəzənfərov Azərbaycan mətbuatı vasitəsi ilə (xüsusən də "Bizim yol” qəzeti) problemi ictimailəşdirərək M.Novruzovun əməlləri barədə hüquq-mühafizə orqanlarının tədbir görməsini xahiş edir.
Bir həftə əvvəl isə N.Qəzənfərov məhz M.Novruzovu himayə edən yüksək ranqlı məmurların mövcudluğuna ehyam vuraraq Azərbaycanda yaşayan ailəsinə (qardaşının həbsi, sonradan buraxılması) qarşı başladılan təziqlərlə bağlı Daxili işlər naziri Ramil Usubova müraciət edib.
Bu müraciətdən sonra M.Novruzov sahibi olduğu "Qurtuluş-93" Yaşayış Kompleksinin mətbuat katibi Turqay Abbaslı vasitəsi ilə özünü müdafiə etdirməyə çalışıb.
N.Qəzənfərov isə XəzərNews.az-a göndərdiyi müraciətində M.Novruzovun adından yayılan cavab açıqlamasının həqiqətə uyğun olmadığını söyləyir.
N.Qəzənfərovun müraciətini olduğu kimi təqdim edirik:
Hörmətli redaksiya!
Əvvəla, Ukraynanın Lvov şəhərində tikdiyim binanın sökülməsi ilə bağlı M.Novruzovun yaydığı informasiyalar qeyri-dəqiqdir, ictimaiyyəti çaşdırmaq məqsədi daşıyır. Aşağıda təqdim etdiyim fotolardan da göründüyü kimi bina yerindədir və heç kim tərəfindən sökülməyib. M.Novruzov gördüyünüz bu binanı düz 1 il əvvəl Bakıdakı general dostuna (həmin generalın kimliyini bilirəm, sadəcə etika xatirinə hələlik adını hallandırmağa ehtiyac görmürəm) arxalanıb məni "Azərbaycandakı qohumlarımı həbs etdirmək”, Ukranyada özünə yaxın kriminal aləmin nümayəndələrinin əli ilə öldürəcəyilə hədələyərək digər bir ukranyalı iş adamına satmağa məcbur etmişdir. Satışdan əldə olunan vəsait bilavasitə M.Novruzova çatmışdır. M.Novruzov daha sonra iddia edir ki, sözügedən bina qeyri-qanuni tikilib. Əgər həqiqətən də belədirsə, onda M.Novruzov bu binanı başqa bir iş adamına (həm də ukraynalıya) necə satıb?
İkincisi, M.Novruzov mənə təzyiq məqsədi ilə qardaşımın polis tərəfindən Şabran rayon Polis İdarəsinə, oradan da Bakıya aparılmasını təzkib edir. Yaxşı, M.Novruzov general dostunun köməyi ilə mənə və ailəmə qarşı təzyiqlər göstərməyibsə bütün bunları haradan bilir? Bildiyim qədər ilə M.Novruzov polis orqanlarına çalışmır.
Üçüncüsü, M.Novruzov iddia edir ki, mənim yaxın qohumlarım bu gün də onun obyektlərində çalışır. Əgər belədirsə, buyursun, konkret ad çəksin.
Dördüncüsü, M.Novruzov iddia edir ki, Həcc ziyarətində olub, hansısa qeyri-müəyyən xeyriyyə işləri ilə məşğuldur və s. Əlbəttə, Həcc ziyarəti müqəddəsdir, onu heç kim dana bilməz. Ancaq bir həqiqi Hacı illərlə iş gördüyü, sonradan malını və pulunu qəsb etdiyi şərikini, onun xanımını, övladılarını iyrənc söyüşlərlə söyə bilərmi? M.Novruzovun özümə, ailəmə WhatsApp vasitəsilə etdiyi söyüşləri, təhqirləri, ölüm hədələrini sübut kimi saxlayıram və zamanında onları da həm hüquq-mühafizə orqanlarına, həm də media vasitəsilə Azərbaycan ictimaiyyətinin diqqətinə çatdıracağam.
"Qurtuluş 93”ün kanalizasiya xətti "Duzlu göl”ə axır
Bu arada Nazim Qəzənfərov Lvov şəhəri, Liçakovski küçəsi, 259-da yerləşən binanın kanalizasiya xətti ilə bağlı Məhərrəm Novruzovla aralarında baş verən maraqlı bir dialoqu da xatırladır. N.Qəzənfərov bildirir ki, məlum bina hazır olandan sonra 500 metr məsafədən kanalizasiya xətti çəkməli idik. M.Novruzov bildirdi ki, o qədər pul xərcləyib 500 metr məsafədən kanalizasiya xətti çəkməkdənsə, kanalizasiyanı binanın arxasından keçən qrunt və bulaq sularından yaranmış kiçik çaya qoşaq: "Əlbəttə, mən bunun cinayət olduğunu bildirdim və o mənim sözümə gülərək dedi: "Mən o boyda "Qurtuluş 93”-ün ana kanalizasiya xəttini gizli yolla "Duzlu gölə” qoşmuşam və heç bir problem də yoxdu”. Sözün düzü bu məni şoka saldı. Müalicə əhəmiyyətli "Duz göl”ü çirkaba bulaşdırmağı gələcək nəsillər bizə bağışlamaz. Fikirləşəndə ki, "Duz göl”ün digər tərəfində çox yüksək səviyyəli xörək duzu istehsal olunur, məni dəhşət bürüdü. Yeri gəlmişkən, Azərbaycanın müvafiq dövlət qurumları M.Novruzovun verdiyi bu informasiyanın nə qədər həqiqət olduğunu araşdırmalıdırlar”.
Sonda N.Qəzənfərov bildirir ki, M.Novruzov 3 il əvvəl ona tikdiyi ev, otel, restoranların pulunu vermək əvəzinə sözügedən obyektləri guya keyfiyyətsizdir adı altında rənglətdirir, lazımsız təmirlər etdirir.
