Stadionun direktoru işdən çıxarılıb? - Açıqlama
14-08-2015, 19:39
“Qarabağ”ın avrokuboklarda ev oyunlarını keçirdiyi Tofiq Bəhramov adına respublika stadionu ot örtüyünün saralmasına görə təmirə bağlanılıb. Qazonun bərpası təmsilçimizin "Yanq Boyz"la oynayacağı cavab matçına qədər başa çatacaq. Axar.az-ın sport7.az saytına istinadən yaydığı xəbərə görə, bunu stadionun direktoru Akif İsmayılov deyib. Onun sözlərinə görə, bərpa işləri yüksək səviyyədə gedir:
“Havaların isti keçməsi işimizə bir az təsir edir. Buna baxmayaraq, uşaqlar çalışırlar. Ot örtüyündə artıq dəyişikliyin olduğunu hiss etmək mümkündür”.
A.İsmayılov ot örtüyünün bərbad hala düşməsinə görə işdən azad olunması haqda xəbərləri yalanlayıb: “Vallah, vəzifəmin başındayam. İşimdən azad olunmamışam. Bu, doğru məlumat deyil. Ötən gün də işdə olmuşam, sabah da olacam”.
Geri qayıt