Putin 755 ABŞ diplomatının fəaliyyətinə

Rusiya prezidenti Vladimir Putin ABŞ-ın Moskvaya qarşı tətbiq etdiyi yeni sanksiyalara cavab olaraq bəyan edib ki, ABŞ diplomatik missiyalarını 755 ştatlı işçi tərk etməlidir.

İşçilərin ixtisar edilməsilə bağlı qərar cümə günü verilsə də, indi cənab Putin sentyabrın 1-də getməli olan işçi sayını təsdiqləyib.
Qərar işçi sayını 455-ə endirir, bu rəqəm təxminən Rusiyanın Vaşinqtonda işləyən işçilərinin sayı ilə eynidir.

Müasir tarixdə hər hansı ölkədən qovulan ən çoxsaylı diplomat olmaq çətindir, BBC-nin Vaşinqtondakı əməkdaşı Laura Bicker hesab edir.

Siyahıya Rusiya boyunca ABŞ diplomatik nümayəndəliklərində işləyən rusiyalı əməkdaşlar da daxildir, BBC-nin Moskvadakı əməkdaşı Sarah Rainsford deyir.

Qərar Moskvadakı səfirliyin işçilərinə, habelə Yekaterinburq, Vladivostok və Sankt Peterburqdakı konsulluq əməkdaşlarına da təsir edib, o əlavə edir.

ABŞ bu addımın "təəssüf doğurduğunu" bildirib.
"Biz belə bir məhdudiyyətin təsirini və ona necə cavab verəcəyimizi qiymətləndiririk", Dövlət Departamentinin rəsmisi bildirib.
Putin açıqlamasında barışdırıcı qeyd də əlavə edərək deyib ki, o, daha çox ölçü götürmək istəməyib. Eyni zamanda prezident vurğulayıb ki, əlaqələrin "yaxın zamanda" dəyişəcəyini hesab etmir.

Rusiya televiziyasına müsahibə verən Vladimir Putin deyib:

"ABŞ səfirliyi və konsulluqlarda mindən çox insan işləyirdi və hələ də işləyir….və 755 insan Rusiyada öz fəaliyyətini dayandırmalıdır".
Rusiya onu da bəyan edib ki, ABŞ diplomatları tərəfindən istifadə olunan mülklər və anbarlar geri alınıb.

Putin daha çox tədbirlərin nəzərdən keçirilə biləcəyini deyib, lakin bildirib ki, "mən bugünkü kimi bunun əleyhinəyəm".
Yeni sanksiyalar, həm 2014-ci ildə Krımın Rusiya tərəfindən ilhaqına, həm də Rusiyanın ABŞ prezident seçkilərinə müdaxiləsi iddialarına cavab olaraq tətbiq edilib.

Ötən ilin dekabrında Obama administrasiyası ABŞ Demokratik partiyasından prezidentliyə namizəd olan Hillary Clinton-un emaillərinə müdaxilə edilməsinə cavab olaraq Rusiyanın iki diplomatik kompleksini bağlayıb, 35 rusiyalı diplomatı ölkədən çıxarıb.

Yeni sanksiyalar Ağ Evin etirazlarına baxmayaraq Konqresin hər iki palatası tərəfindən dəstəklənib.

ABŞ xüsusi xidmət orqanları hesab edirlər ki, Rusiya 2016-cı il prezident seçkilərini Donald Trump-ın xeyrinə dəyişmək istəyib. Hazırda Trump kampaniyasının üzvlərin buna yardım edib-etməməsi barədə təhqiqatlar gedir.

Rusiya seçkilərə müdaxilə iddialarını həmişə təkzib edib. Cənab Trump təkid edir ki, heç bir sövdələşmə olmayıb (BBC).