"ABŞ-ın oturuşmuş strukturu var, dərin dövləti var..."

Hillari Klintona qalib gələn Donald Tramp ABŞ prezidenti seçildi.

Hillari Klinton Donald Trampı Rusiyanın adamı olmaqda ittham edirdi. Hətta bəzi ekspertlər Hillari Klintonun məğlubiyyətini Putinin qələbəsi kimi təqdim etdi.

ABŞ-da keçirilən prezident seçkilərinin nəticələri barədə Ümid Partiyasının sədri İqbal Ağazadə Ölkə.Az-a danışıb:

"ABŞ-da keçirilən prezident seçkilərinin nəticəsindən məyus oldum. Məyus olmağımın səbəbi o deyil ki, ABŞ kursundan dönəcək, dəyişəcək. Şəxsiyyətlərinin siyasətləri nə qədər böyük olsa da, sistemlər işləyir və o sistemləri dəyişmək mümkün olmur.

Donald Tramp qədər aqressiv bir adam ABŞ cəmiyyətində prezident seçilirsə, bu ABŞ cəmiyyətinin ümumi problemlərə münasibətdə əhalinin yanaşmasıdır. Bu qorxuludur. ABŞ-da bu qədər aqressiv çıxışa, aqressiv yanaşmaya, qadınlara münasibətdən tutmuş, cəmiyyətlərə, irqlərə, dinlərə sərt münasibət çıxdısa və o adam səs qazandısa, bu, ABŞ cəmiyyətinin, insanlarının düşüncələrindəki köklü dəyişikliklərdən xəbər verir.

Donald Trampa Rusiyanın dostu deyirlər. Bir ABŞ vətəndaşı Rusiyanın dostu ola bilməz. Olacaqsa, onda o bizim tanıdığımız ABŞ deyil. O ABŞ-da tamam başqa şeylər var. Bu siyasətdə söz olaraq deyilə biləcək nələrsə var, ancaq onların çoxu həyata keçməyəcək. Ona görə ki, şəxslərdən əlavə ABŞ-ın oturuşmuş strukturu var, dərin dövləti var. ABŞ-ın Rusiya siyasətində yumuşalma ola bilər, bunun olmasını biz də istəyirik. Dəyişməyən Rusiyaya qarşı necə yumuşaq davranmaq olar? Əgər dəyişsə, onda o bizim tanıdığımız ABŞ olmayacaq".