Baş infeksionist əhaliyə çağırış etdi

“Qurban bayramı ilə əlaqədar vətəndaşlar arasında artacaq təması nəzərə alaraq, kütləvi toplanış yerlərində tibbi maskadan istifadə etmək, sosial məsafəni qorumaq, ümumiyyətlə bütün gigiyena qaydalarına əməl etmək lazımdır”.

Axşam.az xəbər verir ki, bunu Səhiyyə Nazirliyinin Baş infeksionisti Təyyar Eyvazov nazirliyin instaqram hesabında “İmmunitet və peyvənd sertifikatı” mövzusundakı çıxışı zamanı deyib.

Baş infeksionist bildirib ki, hazırda ölkədə yeni növ koronavirus (COVID-19) infeksiyası ilə yoluxma sayı yüksək olmasa da, nəzərə almaq lazımdır ki, daha aqressiv və yoluxuculuğu yüksək olan “delta” ştammı Azərbaycanda da qeydə alınıb:

“Ölkədə pandemiya ilə bağlı hazırki tarazlığı uzunmüddətli qabaqlayıcı tədbirlər nəticəsində əldə etmək mümkün olub. Vətəndaşların könüllü olaraq vaksinasiyada iştirak etmələri səhiyyə orqanlarının pandemiya ilə mübarizəsini asanlaşdırır”.

T. Eyvazov vurğulayıb ki, Ümumdünya Səhiyyə Təşkilatının təsdiqlədiyi peyvəndlər COVID-19-un yeni ştammlarına qarşı effektivdir:

“Sadəcə vaksinlərin effektivliyi baxımından, ştammlar arasında müəyyən fərqlər ola bilər. Məsələn, hazırda istifadə edilən vaksinlərin “delta” ştammına qarşı təsiri əvvəlkilərlə müqayisədə bir qədər az ola bilər. Lakin istənilən halda, pandemiyadan qurtulmağın yeganə və ən effektiv yolu vaksinasiyadır. Vətəndaşları vaksinasiyada könüllü iştirak etməyə və bayram günlərində və ümumiyyətlə yay aylarında daha məsuliyyətli və diqqətli olmağa çağırıram”.