Türkiyədə kritik seçkilər: bülletenlərin 65 faizi hesablanıb, ƏRDOĞAN LİDERDİR!

Türkiyədə kritik seçkilər: bülletenlərin 65 faizi hesablanıb, Ərdoğan liderdir

Türkiyədə keçirilən prezident seçkilərində bülletenlərin 65 faizi hesablanıb.

“Anadolu” agentliyinin verdiyi xəbərə görə, ilk yeri səslərin 55,47%-ni toplayan Türkiyənin hazırkı prezidenti Rəcəb Tayyib Ərdoğan tutur. İkinci yerdə Cümhuriyyət Xalq Partiyasının (CHP) namizədi Məhərrəm İncə (29,22%), üçüncü yerdə isə İyi Partiyanın sədri Meral Akşenerdir (07,47%).

Xatırladaq ki, namizədlərdən heç biri 50%-dən artıq səs toplaya bilməsə, birinci turda ən çox səs toplayan iki namizəd iyulun 8-də keçiriləcək ikinci turda mübarizə aparacaq.

*   *   *21:00

Türkiyədə keçirilən prezident seçkilərində bülletenlərin 42 faizi hesablanıb.

“Anadolu” agentliyinin verdiyi xəbərə görə, ilk yeri səslərin 56,98%-ni toplayan Türkiyənin hazırkı prezidenti Rəcəb Tayyib Ərdoğan tutur. İkinci yerdə Cümhuriyyət Xalq Partiyasının (CHP) namizədi Məhərrəm İncə (28,31%), üçüncü isə İyi Partiyanın sədri Meral Akşenerdi (07,45%).

Növbədənkənar parlament seçkilərində səslərin 31 faizi sayılıb.

Sayılan səslərə əsasən, “Cümhur ittifaqı” 59,69%,, “Millət ittifaqı” 29,86% , Xalqların Demokratik Partiyası (HDP) isə 8,98 faiz səs toplayıb.

Qeyd edək ki, hakim Ədalət və İnkişaf Partiyası və Milliyətçi Hərəkat Partiyası parlament seçkilərinə birgə blokda – “Cümhur ittifaqı”nda qatılıb, Böyük Birlik Partiyasının (BBP) namizədləri isə “Cümhur ittifaqı”nda AKP namizədləri qismində yer alıblar. CHP, İyi Partiya, Səadət Partiyası və Demokratik Partiya isə parlament seçkilərinə “Millət ittifaqı”nda qatılıblar.

*   *   *20:15

Xəbər verdiyimiz kimi, Türkiyədə prezident və parlament seçkilərində səsvermə yerli vaxtla 17:00-da sona çatıb.

Virtualaz.org bildirir ki, hazırda səslər sayılır.

Ali Seçki Qurumu Türkiyə vaxtı ilə 18:45-dən (Bakı vaxtı ilə 19:45) başlayaraq, nəticələrin canlı olaraq rəsmən yayımlanacağı barədə məlumat yayıb.

Hələlik bülletenlərin 26,1 faizi sayılıb.

Nəticələr belədir:

1. Rəcəb Tayyib Ərdoğan - 58,5%

2. Məhərrəm İncə - 27,10%

3. Maral Akşənər - 7,6%

4. Səlahəddin Dəmirdaş - 5,50%

5. Təməl Qaramollaoğlu - 0,94%

6. Perinçək - 0,18%

Parlament seçkisi: Sayılan bülletenlər - 11,6%

1. AKP - 51,9

2. MHP - 13,1

3. CHP - 15,6

4. HDP - 7,3

5. İYİ - 8,5

6. SP - 1,3

***19:34

Türkiyədə keçirilən növbədənkənar prezident və parlament seçkilərində səsvermə yerli vaxtla 17:00-da başa çatıb.

Virtualaz.org yerli KİV-ə istinadən bildirir ki, bu barədə Türkiyənin Ali Seçki Qurumu məlumat yayıb.

Ali Seçki Qurumunun rəhbəri Sədi Güvən bildirib ki, ilkin nəticələr saat 19:00-dan sonra, yekun nəticə isə 23:00 radələrində açıqlanacaq.

Prezident seçkilərinə Türkiyənin hazırkı prezidenti Rəcəb Tayyib Ərdoğan, Cümhuriyyət Xalq Partiyasının (CHP) namizədi Məhərrəm İncə, İYİ Partiyasının sədri Maral Akşənər, Səadət Partiyasının sədri Təməl Karamollaoğlu, Vətən Partiyasının sədri Doğu Perinçək və Xalqların Demokratik Partiyasının (HDP) həbsdə olan namizədi Səlahəddin Dəmirdaş qatılıblar.

Xatırladaq ki, prezident seçkilərinin birinci turunda namizədlərdən hər hansı biri qalib gəlmək üçün seçicilərin 50%-dən artıq səsini toplamalıdır. Namizədlərdən heç biri 50%-dən artıq səs toplamasa, birinci turda ən çox səs toplayan iki namizəd iyulun 8-də keçiriləcək ikinci turda yarışacaq.

Türkiyənin ədliyyə naziri Əbdülhəmid Gülün sözlərinə görə, seçkilər zamanı hər hansı bir ciddi qanun pozuntusu qeydə alınmayıb.

Türkiyənin hazırkı prezidenti Rəcəb Tayyib Ərdoğan da seçkilərdə qanunvericiliyə zidd hər hansı bir ciddi hadisə baş vermədiyini bildirib.

*   *   *18:06

Türkiyədə eyni vaxtda keçirilən prezident və parlament seçkilərində səsvermənin bitməsinə təxminən iki saat qalmış Adil Gürün ictimai rəyi öyrənmə şirkəti keçirdiyi rəy sorğularının nəticələrini açıqlayıb. Bu şirkət ötən seçkilərdə nəticələri ən düzgün təxmin etməsi ilə tanınırdı.

Virtualaz.org xəbər verir ki, rəy sorğularının nəticələrinə görə prezident Rəcəb Tayyib Ərdoğan səslərin 53.5 faizini qazanaraq ilk turda yenidən prezident seçiləcək. Lakin onun partiyası parlamentdə çoxluğu əldən verəcək. AKP-nin 45.4 faiz səs yığması gözlənilir. Buna baxmayaraq AKP blok halında seçkilərə qatıldığı “Cümhur ittifaqı” ilə koalision hökumət yarada bilər. Bu blokda AKP-nin müttəfiqi MHP yer alır.

Rəy sorğuları iyunun 21-22-də Türkiyənin 7 coğrafi bölgəsində, 5 minə yaxın şəxsin arasında keçirilib.

*   *   *10:58

Türkiyənin Yüksək Seçim Kurulunun rəhbəri Sadi Güvən vətəndaşları səsvermə günü “sükunətə dəvət etdiyini” deyib. Virtualaz.org xəbər verir ki, YSK rəhbəri seçkilərin keçirilməsi üçün bütün hazırlıqların görüldüyünü, seçki məntəqələrində elektrikin kəsilməsi hallarına qarşı hazırlıqlı olduqlarını bildirib.

Sadi Güvən bildirib ki, prezident və parlament seçkilərinin nəticələrini yerli vaxtla saat 24.00-dən tez elan etməyə çalışacaqlar.

“Seçkilərlə bağlı hər cür hazırlıqları tamamladıq. Xalqıma sükunət tövsiyə edirəm. Seçki qutularının yanında siyasi partiyaların müşahidəçilərinin olması lazımdır. Onların tərtib etdikləri protokolları eyni zamanda bizə daxil olan kimi dərhal siyasi partiyalara göndəririk, eləcə də nəticələri. YSK-nin işi təkcə səsləri saymaq deyil. Seçki komissiyalarında siyasi partiyaların təmsilçiləri çoxluq təşkil edir. Biz onların saydığı səsləri toplayırıq, bu işi kompüterlər edir və nəticələri vətəndaşlarımıza açıqlayırıq”-Sadi Güven bildirib.

 

Siyasi analitiklərə görə bu, Türkiyədə son onilliklərdə keçirilən ən kritik seçkidir. Seçkilər milli valyutanın dollarla müqayisədə kəskin dəyərdən düşməsi, iqtisadi göstəricilərin pisləşməsi, ölkədən kapital axınının sürətlənməsi və yüksək inflyasiya şəraitində keçirilir. Bütün bunlar da prezident Rəcəb Tayyib Ərdoğanın populyarlığını azaldıb. Belə görünür ki, Türkiyə ordusunun seçkilər ərəfəsində Suriyanın şimalında kürd birləşmələrinə qarşı əməliyyatları da hakim partiyanın səslərinə ciddi təsir etməyəcək. Çünki iqtisadi vəziyyətin pisləşməsi xarici hərbi uğurlar hesabına xalqdan lazım olan səsləri almağa imkan verməyə bilər.

Digər tərəfdən Ərdoğan ilk dəfədir onu daban-dabana izləyən rəqiblərlə yarışır. CHP-nin prezidentliyə namizədi, keçmiş fizika müəllimi Muharrəm İncə izdihamlı seçki mitinqləri keçirib və rəy sorğularına görə səslərin yarıdan çoxunu toplamasa belə birinci turda Ərdoğanın qalib gəlməsinin yolunu kəsə bilər. Habelə “İYİ parti”nin namizədi Meral Akşener Ərdoğanın elektoratının bir qismini öz tərəfinə çəkə bilib.

Parlamentdə isə AKP-nin artıq təkpartiyalı hökumət formalaşdırmağa bəs edəcək qədər mandat qazanmasına böyük şübhə var. Müxalifət partiyaları ilk dəfə hakim partiyaya qarşı koalisiyada birləşib və rəy sorğuları AKP-nin parlamentdə üstünüyü əldən verə biləcəyini göstərir.

*   *   *09:58

Bu gün Türkiyədə prezident və parlament seçkiləri keçirilir.

Virtualaz.org-un məlumatına görə, prezident seçkilərində Türkiyənin hazırkı prezidenti Rəcəb Tayyib Ərdoğan, Cümhuriyyət Xalq Partiyasının (CHP) namizədi Məhərrəm İncə, İyi Partiyanın sədri Meral Akşener, Səadət Partiyasının sədri Təməl Karamollaoğlu, Vətən Partiyasının sədri Doğu Perinçək və Xalqların Demokratik Partiyasının (HDP) həbsdə olan namizədi Səlahəddin Dəmirtaş mübarizə aparırlar.

R. T. Ərdoğanın namizədliyini sədri olduğu hakim Ədalət və İnkişaf Partiyası (AKP), Milliyətçi Hərəkat Partiyası (MHP), Böyük Birlik Partiyası (BBP) və Hüda-Par dəstəkləyir.

Türkiyə Böyük Millət Məclisindəki 600 mandat uğrunda isə AKP, MHP, BBP, CHP, İYİ Partiya, Səadət Partiyası, Demokratik Partiya, Xalqların Demokratik Partiyası, Müstəqil Türkiyə Partiyası, Müstəqil Mübarizə - HÜDA Partiyası,  Vətən Partiyası mübarizə aparırlar. AKP və MHP parlament seçkilərinə birgə blokda – “Cümhur ittifaqın”da qatılıb. BBP namizədləri “Cümhur ittifaqın”da AKP namizədləri qismində yer alıblar. CHP, İyi Partiya, Səadət Partiyası və Demokratik Partiya isə parlament seçkilərinə “Millət ittifaqı”nda qatılıblar.

Türkiyədəki 59 milyon 391 min 328 vətəndaş səsvermə hüququna malikdir. Bu seçicilərin 56,3 milyonu Türkiyədə, qalanı isə xarici ölkələrdə yaşayır. Bundan əvvəl xaricdəki seçicilər üçün səsvermə prosesi başa çatıb, bülletenlər Türkiyəyə gətirilib.

Səsvermə prosesini izləmək üçün 34 ölkədən 650 KİV təmsilçisinə, eləcə də 500 yaxın beynəlxalq müşahidəçiyə icazə verilib.

Artıq səcvermə başlayıb. Ankara vaxtı ilə saat 8.00-da start götürən səsvermə saat 17.00-da başa çatacaq.

Ali Seçki Komissiyasının məlumatına görə, səsvermənin ilkin nəticəsinin günün sonunadək açıqlanması nəzərdə tutulub.

 






Fikirlər

Şərh müəllifi: zse                 Tarix: 27 iyun 2018 05:37                 [ Cavabla ]
The bridge side of replica watches the dial is made of German silver, black replica watches uk rhodium-plated, polished, and rolex replica dot-patterned finishes, which are replica omega ornamental.

                        

Şərh bildir
(Şərh yazarkən oxucular dini, irqi, milli ayrı-seçkiliyə yol verməməli, insan şəxsiyyətinə toxunacaq qeyri-etik ifadələr işlətməməli, ölkə qanunvericiliyinə zidd çağırışlar etməməlidir. Əks halda belə şərhlər ya redaktə ediləcək, ya da ümumiyyətlə, sayta buraxılmadan silinəcək.)
Qalın mətn Maili mətn Vurğulanmış mətn Silinmiş mətn | Sol kənar üzrə düzləşdir Mərkəz üzrə düzləşdir Sağ kənar üzrə düzləşdir | Təbəssümlərin əlavə edilməsi Linkin əlavə edilməsiQorunmuş linkin əlavə edilməsi Rəngin seçimi | Gizli mətn Sitatın əlavə edilməsi Seçilmiş mətni kiril əlifbası transliterasiya ilə dəyişdir Spoylerin yerləşdirməsi