İlin əvvəlinə qədər gömrük monopoliyasına faktiki başçılıq edən, “Trans Broker” MMC-nin rəhbəri Əbülfəz Məlikov barədə hüquq-mühafiz orqanlarının araşdırmaları yekunlaşmaq üzrədir.
Gömrük bossunun yaxınlarda həbs ediləcəyi də istisna deyil. Bu barədə istiqlal.az-a gömrükdəki mənbələrdən məlumat daxil olub.
Mənbənin məlumatına görə, baş brokerin yeyintiləri barədə materialları prezidentin iqtisadi islahatlar üzrə köməkçisi Natiq Əmirov hüquq-mühafizə orqanlarına təqdim edib: Bu ilin əvvəlində gömrük monopoliyası ləğv edilsə də, MMC fəaliyyətini davam etdirib, brokerlər qeyri-rəsmi gömrük imtiyazlarından faydalanmaqla idxal bazarında dominant mövqelərini qoruyub saxlayırlar. Xüsusilə də qida məhsulları bazarında. Bu mövqelərindən istifadə etməklə hətta keyfiyyətsiz məhsulları ölkəyə gətirirlər. Məsələn, brokerlər yağların ölkəyə idxalında dominant mövqeyə sahibdirlər. Onlar bundan faydalanaraq keyfiyyətsiz və zəhərli maddələrlə zəngin "Putinka yağları"nı ölkəyə daşıyırlar. Bunla bağlı materiallar prezidentin köməkçisinə təqdim edilib. O da öz növbəsində məsələni araşdırmaq üçün materialları hüquq-mühafizə orqanlarına təqdim edib. Araşdırmalar yekunlaşmaq üzrədir.
