DEPUTATLARIN MANDATDAN məhrum edilməsi ilə bağlı QAYDA MÜƏYYƏNLƏŞİB

Milli Məclis deputatının mandatdan məhrum edilməsi haqqında Mərkəzi Seçki Komissiyasının qərarının mübahisələndirilməsinə dair iddia üzrə icraatla bağlı qayda müəyyənləşib.
Modern.az-ın məlumatına görə, bununla bağlı İnzibati Prosessual Məcəlləyə dəyişiklik təklif edilib.

İnzibati Prosessual Məcəlləyə Milli Məclis deputatının mandatdan məhrum edilməsi haqqında Mərkəzi Seçki Komissiyasının qərarının mübahisələndirilməsinə dair iddia üzrə icraatla bağlı yeni fəsil əlavə olunur.

Yeni fəsildə deyilir ki, yuxarıda adı çəkilən iddia ərizəsi apellyasiya instansiyası məhkəməsinə həmin qərar rəsmi dərc edildiyi gündən 10 gün müddətində verilir. Ərizə məhkəmə tərəfindən 15 gün müddətində baxılmalı və onun mahiyyəti üzrə qərar qəbul edilməlidir.

Məhkəmə tərəfindən iddia ərizəsinə ərizəçinin və Mərkəzi Seçki Komissiyasının nümayəndəsinin iştirakı ilə baxılır. Məhkəmə iclasının vaxtı və yeri haqqında xəbərdar edilmiş şəxslərin məhkəməyə gəlməməsi işə baxılmasına və onun həll edilməsinə mane olmur. İş üzrə apelyasiya instansiyası məhkəməsinin qərarından həmin qərarın tam formada təqdim olunduğu gündən 10 gün müddətində Ali Məhkəməyə şikayət verilə bilər.

Ali Məhkəmə şikayətə onun daxil olduğu vaxtdan 15 gün müddətində baxıb qərar qəbul etməlidir.

Qanun layihəsinə dəyişikliyə Milli Məclisi Hüquq siyasəti və dövlət quruculuğu komitəsinin iyunun 12-də keçirilən komitə iclasında baxılıb.

Bundan əlavə, İnzibati Xətalar, Cinayət, Mülki Prosessual, Cinayət Prosessual, Cəzaların İcrası məcəllələrinə, “Yol hərəkəti haqqında”, “Dövlət qulluğu haqqında”,  “İcra məmurları haqqında”, “Polis haqqında”, “Feldyeger rabitəsi haqqında” qanunlara dəyişikliklərin edilməsi barədə,  “Feldyeger rabitəsi orqanında xidmətkeçmə haqqında” Əsasnamənin təsdiq edilməsi barədə” qanun layihələri Milli Məclisin plenar iclasına tövsiyə olunub.






Fikirlər