“Bir çox insan prezidentin xidmətlərini müzakirə edir, lakin heç kim birinci xanımın gördüyü işlərdən danışmır”.

Bunu 2009-cu il yanvarın 20-dən ABŞ-ın 44-cü prezidenti postuna seçilmiş və 2017-ci ilin yanvarında səlahiyyət müddəti bitəcək Barak Obama çıxışlarından birində zarafatla deyib.

Obamanın söylədiyi nə qədər zarafat olsa da, bir o qədər də həqiqətdir: xanımı Mişel Obamanın reytinqi onunkundan 20 faiz yüksəkdir.

Məşhur “Vogue” jurnalı Mişelin Ağ Evə gəlişini “Gözlədiyimiz birinci xanım” kimi dəyərləndirib.

Onun 2009-cu ildə inaqurasiya mərasimində “Jason Wu” brendindən geyindiyi biserlə bəzədilmiş ağ libası moda aləmində demək olar ki, 1 il yarım müzakirə olunub.

Dünya prezidentləri ilə görüşündə, ziyafətlərdə, yeni il gecələrində və bir çox mühüm tədbirlərdə “Carolina Herrera”, “Marchesa”, “Naeem Khan”, “Monique Lhuillier”, “ Peter Soronen”, “ Michael Kors” kimi məşhur brendlərdən libaslar geyinən M. Obama ABŞ tarixinin ən çox bəyənilən birinci xanımları – şahzadə Diana və Jaklin Kennedi ilə müqayisə olunub.