Bakıda şirkətlərdən külli miqdarda oğurluq edən dəstənin cinayət işi üzrə məhkəmə iclası davam etdirilir.

Onlardan biri bütün cinayəti öz üzərinə götürür. Sonuncu məhkəmə iclasında gərginlik yaşanıb və təqsirləndirilən şəxslərdən biri məhkəmə zalından çıxarılıb. 

Musavat.com xəbər verir ki, Bakı Ağır Cinayətlər Məhkəməsində külli miqdarda oğurluq etməkdə təqsirləndirilən Rafiq Məmmədov, Elşən Aslanov və Rüfət Qurbanovun cinayət işi üzrə məhkəmə iclası davam etdirilib.

Hakim Rasim Sadıqovun sədrliyi ilə keçirilən prosesdə şahid qismində Qadir Əliyev ifadə verib. Qadir Əliyev də indi həbsdədir. O da oğurluqda ittiham edilərək, həbs edilib.

Qadir Əliyev bu məhkəmədə şahid qismində dindirilib. Ona görə ki, o, iki oğurluq epizodunda Rafiq Məmmədovla birlikdə olub. Qadir Əliyev bunu təsdiqləyib və bildirib ki, hazırda da buna görə cəzasını çəkir. Rafiq Məmmədov da  Qadir Əliyevin dediklərinə etiraz etməyib.

Daha sonra məhkəmədə gərginlik yaşanıb. Buna səbəb prosesdə şahid qismində dindirilən “Saqa” gəmi təmiri şirkətinin əməkdaşının dedikləri olub. Şahid bildirib ki, şikrətin seyfindən oğurlanan məbləğ 18 min dollar olub. Amma təqsirləndirilən şəxslər məbləğin şişirdildiyini deyərək buna etiraz edib. Rüfət Qurbanov şahidin yalan danışdığını deyib və buna etiraz edib. Tərəflər arasında gərginlik yaşandığı üçün dustaq Qurbanov məhkəmə prosesini pozduğu üçün zaldan çıxarılıb.

Həbs edilənlərdən Rafiq Məmmədov əməllərini təsdiqləyib və qeyd edib ki, oğurluq əməllərini tək edib. O, seyfi lomla qırdığını, dəmir barmaqlıqları isə xüsusi qayçı ilə kəsdiyini bildirib.

Bildirək ki, ötən proseslərdə suallara cavab verən Rafiq Məmmədov əldə etdiyi bu qədər pulu hara xərclədiyini gülərək belə izah edib: "Seyfi açanda dedim bəlkə hamısı kağızdı. Sonra baxdım ki, gerçək puldur. Pulları görəndə gözümün qabağına maşınlar, gəzmək, əyləncə gəlir. Pulun hamısını xərcləmişəm".

Rafiq Məmmədov digər pulları da müxtəlif əyləncələrə, Antalyaya istirahətə gedəndə xərclədiyini deyib. Suallara cavabında Rafiq Məmmədov oğru aləminə yaxın olmadığını, ələ keçirdiyi pulları heç kimlə bölmədiyini söyləyib.

İttiham aktına əsasən, R.Məmmədov, E.Aslanov və R.Qurbanov qabaqcadan əlbir olaraq, bir qrup şəxs halında təkrar olaraq özgənin külli miqdarda əmlakını oğurlayıblar.

Bundan əlavə R.Məmmədov və E.Aslanov satış məqsədi ilə qanunsuz olaraq külli miqdarda narkotik vasitə olan heroin əldə edərək saxlamaqda da günahlandırılırlar.

Cinayət işinin istintaqı zamanı müəyyən edilib ki, R.Məmmədov tanışı Vaqif Rəhimovla birgə 2006-cı ildə "Karvan L" şirkətinin ofisindən ümumilikdə, 190 min 496 manat, 2008-ci ildə "Moqobs" MMC-nin ofisindən 158 min 594 manat, 2010-cu ildə "Saqa" gəmi təmiri şirkətinin ofisindən 40 min 800 manat, 2011-ci ildə "Təmizləmə avadanlıqlarının satışı mağazası"ndan 510 min manat məbləğində pul oğurlayıb.

2014-cu ildə də həbs edilən R.Məmmədov oğurluqda təqsirli bilinib və Bakı Ağır Cinayətlərinin hökmü ilə 4 il müddətinə azadlıqdan məhrum olunub. 2016-cı ildə isə o, Xətai Rayon Məhkəməsinin qərarı ilə 5 ay 17 gün çəkilməmiş cəzadan vaxtından əvvəl şərti azadlığa buraxılıb.

R.Məmmədov məhkumluğu götürülmədən və ödənilmədən yenidən cinayətə əl atıb.

Belə ki, o, 2016-cı ildə Rasim Əliyevə məxsus Bakı şəhəri ərazisində yerləşən ofisdən 7 min manat pul oğurlayıb. 2017-ci ildə isə R.Məmmədov Azərbaycan Dini Qurumlarla İş üzrə Dövlət Komitəsinin Bakı şəhəri üzrə şöbəsinin iş otağına qanunsuz daxil olub və şöbə müdrinə məxsus olmaqla içərisində möhür və blanklar olan 1050 manat dəyərində "FDX-30" markalı seyfi talayaraq aparıb.

Bundan başqa, o, Qadir Əliyevlə birgə Murad Bədirovun rəhbərlik etdiyi MCM şirkətinin ofisindən 8 min 253 manat, "Total İT" MMC-nin ofisindən 13 min 797 manat, "Azəri Ekspress" MMC-nin ofisindən Rauf Səfərovun 6 min 202 manatını, Vahel Abdullayevin isə 7 min 200 manatını, "İndeks.az" MMC-nin ofisindən 43 min 200 manat, 2017-ci ildə "Saqa" gəmi təmiri şirkətinin ofisindən 600 manat pul oğurlayıb.

R.Məmmədov daha sonra R.Qurbanov, E.Aslanov və qeyriləri ilə birgə 2017-ci ilin avqust ayının 10-da "M-Trans" MMC-nin ofisindən 15 min 500 manat, "MS Orbita" şirkətinin ofisindən 67 min 441 manat pulu gizli yolla oğurlayıblar.

R.Məmmədovla E.Aslanovun barəsində Cinayət Məcəlləsinin 177.3.2-ci (oğurluq, külli miqdarda), 234.4.3-cü (külli miqdarda narkotik) və R.Qurbanovun isə 177.3.2-ci maddəsi ilə ittiham irəli sürülüb.

Xatırladaq ki, R.Məmmədovla yanaşı, E.Aslanov da məhkumluq həyatı yaşayıb. O, 2012-ci ildə oğurluq və narkotikdə təqsirli bilinib və 4 il 6 ay müddəti ilə azadlıqdan məhrum edilib. E.Aslanov 2016-cı ildə isə azadlığa buraxılıb.