Bakı Slavyan Universitetində (BSU) “Məzun günü” qeyd olunub.

Əvvəlcə BSU-nun foyesində ulu öndər Heydər Əliyevin büstü önünə əklil qoyulub. Tədbir Azərbaycan Respublikasının dövlət himninin səsləndirilməsi ilə başlanıb. Sonra məzunlar zala Azərbaycan Respublikasının bayrağını gətiriblər.

BSU-nun mətbuat xidmətindən "AzerTaym.az"-a verilən məlumatda bildirilib ki, bildirilib ki, tədbiri rektor Nurlana Əliyeva açaraq əlamətdar gün münasibətilə məzunları və valideynləri universitetin professor-müəllim heyəti adından təbrik edib, onlara yeni nailiyyətlər arzulayıb. Ölkəmizdə dövlət tərəfindən gənclərə göstərilən diqqət və qayğıdan danışan rektor Nurlana Əliyeva Prezident İlham Əliyevin gənclər barədə verdiyi sərəncamlardan söz açıb. O, məzunları gələcək fəaliyyətlərində Bakı Slavyan Universitetinin adını uca tutmağa və müstəqil ölkəmizin tərəqqisinə töhfə verməyə çağırıb. Nurlana hərbi xidmətə gedəcək məzunlara Vətənin keşiyində möhkəm dayanmağı arzu edib.

Məzunları təbrik edən Azərbaycan Ağsaqqallar Şurasının sədri Fəttah Heydərov ölkəmizdə bilikli və bacarıqlı gənclərə daim ehtiyac olduğunu diqqətə çatdırıb. O, BSU-da müasir tələblərə cavab verən ixtisaslı kadrlar hazırlamasını və həyata keçirilən yenilikləri yüksək qiymətləndirib.

Sonra məzunlar Bakı Slavyan Universitetinin rəmzi bayrağını III kurs tələbələrinə təhvil verərək BSU məzununun Şərəf Andını və ali məktəbin himnini səsləndiriblər.

Tədbirdə Azərbaycan Vətən Müharibəsi Veteranları Birliyinin sədri Füzuli Rzaquliyev məzunları dünyanın istənilən yerində Azərbaycanı layiqincə təmsil etməyə səsləyib. Sonra Füzuli Rzaquliyev və Veteran.az saytının redaktoru Elnur Səlimov BSU-nun rektoru, professor Nurlana Əliyevaya “Ordunun 100 illiyi” medalını təqdim ediblər.

Yüksək nailiyyətlərinə və universitetin ictimai həyatında fəal iştirakına görə fərqlənən məzunlara “Fəxri məzun” diplomları təqdim olunub.

Magistr Umuxanım Müseyibova universitetdə yaradılmış şəraitə görə rektor Nurlana Əliyevaya məzunlar adından minnətdarlığını bildirib. O, universitetdə çalışan professor-müəllim heyətinin tələbələrə göstərdikləri qayğını yüksək qiymətləndirərək bu illərin heç bir zaman unudulmayacağını deyib. BSU-dan məzun olan türkiyəli tələbə Pınar Dural çıxışında xarici tələbələrə göstərilən xoş münasibətdən, universitetdəki tolerant və multikultural mühitdən danışıb. Sonra əcnəbi tələbələr müxtəlif dillərdə məzunları təbrik edərək Azərbaycan dilində mahnılar səsləndiriblər.

Rusiyanın Azərbaycandakı səfirinin humanitar məsələlər üzrə müşaviri İqor Yeronin, təhsil eksperti, professor Şahlar Əsgərov, Azərbaycan Vətən Müharibəsi Veteranları Birliyinin sədr müavini Abbas Hüseynov çıxışlarında gənclər üzərində böyük əməyi olan valideynləri və müəllimləri təbrik edərək məzunlara uğurlar diləyiblər.

Tədbir geniş konsert proqramı ilə davam edib. Məzunlar əsgər marşı, şeir və vətənpərvər mahnılardan ibarət kompozisiya təqdim ediblər. Konsert proqramı məzunların “Əlvida, Bakı Slavyan Universiteti” mahnısı ilə başa çatıb.

Qeyd edək ki, bu il Bakı Slavyan Universitetindən bakalavriat səviyyəsi üzrə əyani təhsil alan 595, qiyabi təhsil alan 12 tələbə və magistratura səviyyəsi üzrə 115 magistr məzun olub.