ABŞ-ın mühafizəkar qanadının önəmli şəxslərindən olan, Böyük Yaxın Şərq Planını hazırlayanlardan biri Daniel Paypsın “National İnterest” nəşrində Türkiyə-ABŞ münasibətlərinə dair məqaləsi yayımlanıb.

Publika.az xəbər verir ki, məqalədə Türkiyənin anti-ABŞ mövqeyindən əl çəkməyəcəyini yazan Payps mübarizə üçün 8 maddəlik təklif irəli sürür.

“Ərdoğan Türkiyəninin geri dönüşü yoxdur” başlıqlı məqalədə bildirilir ki, Ankara artıq müttəfiq deyil.

Müəllif yazır ki, Vaşinqtonda Türkiyə ilə bağlı mübahisələr var: “Bir qism hesab edir ki, bu, keçici prosesdir, digər qism bunun uzunmüddətli düşmənlik olduğu fikrini müdafiə edir. Fikirlər haçalanıb. Prezident, müdafiə, xarici işlər naziri, eləcə də iqtisadi marağı olanlar bunun keçici olduğunu düşünür. Konqres və analitiklərin çoxu isə bunun uzunmüddətli olduğunu hesab edirlər”.

Onun fikrincə, ABŞ Türkiyənin geri qayıdacağına artıq ümid etməməlidir: “İranın getdiyi kimi, Türkiyə də getdi”.

Payps ABŞ-ın Türkiyəyə qarşı mübarizəsində 8 istiqamət təklif edir.

1. Şikayət edin, qınayın və türklərin İŞİD-i dəstəkləməsi, Suriyanı işğal etməsi, Suriya və İraqı sudan məhrum etməsi, Liviyaya müdaxiləsi, Kipr bölgəsində neft axtarışını həyata keçirməsi kimi məsələlər üzərindən hərəkətə keçin.

2. Ərdoğanın Pensilvaniyada yaşayan siyasi düşməni Fətullah Gülənin Türkiyəyə təhvil verilməsi tələbini rədd edin.

3. Kürdləri, gülənçiləri, parlamentin müxalif fiqurlarına və digərlərinə dəstək verdiyinizi nümayiş etdirmək üçün Vaşinqtondakı yüksək səviyyəli toplantılara dəvət edin.

4. İqtisadi əlaqələri kəsin. Misal üçün, Türkiyənin enerji şirkətlərini kənarlaşdırın, polada gömrük vergisini çoxaldın.

5. Ankaranın Moskvadan S-400 raket sistemi almasına cavab olaraq, Türkiyəni Amerikanın Düşmənlərinə qarşı Sanksiya Qanununa (CAATSA) daxil edin.

6. Nüvə başlıqlarını NATO-nun Türkiyədəki hava bazasından çıxarın. Bu bazaların fəaliyyətini bir müddət məhdudlaşdırın, silahları oradakı təyyarələrə yükləməyin, çünki türklər bu silahları da ələ keçirə bilər.

7. ABŞ əsgərlərini Türkiyədən çıxarın.

8. Türkiyəni NATO-dan çıxarın, səs çoxluğu ilə beynəlxalq hüquqa əsasən bunu edə bilərsiniz.

Qeyd edək ki, D.Payps 15 iyul çevriliş cəhdinə açıq dəstək verdiyi üçün Türkiyəyə girişi qadağan olunub.