Əmək və əhalinin sosial müdafiəsi naziri Sahil Babayev rəhbərlik etdiyi qurumun vəzifəli şəxslərini tədricən işdən kənarlaşdırsa da, boşalan vəzifələrə yeni kadrlar təyin etməyə tələsmir.

Sahil Babayevin ötən gün keçirdiyi iclasda DSMF-nin 11 rayon üzrə şöbə müdirlərini ciddi nöqsanlara yol verdikləri üçün işdən kənarlaşdırması haqqında bəyanatı da ilk baxışdan belə düşünməyə əsas verir.

Çünki həmin 11 rayondakı vəzifələrə də təyinat aparılmayıb.
Digər diqqətçəkən məqam adıçəkilən həmin 11 rayon arasında sabiq nazir Səlim Müslümovun bacısının həyat yoldaşı Əsgər Əsgərovun 3 həftə əvvələ qədər müdiri olduğu DSMF-nin rayon şöbəsinin adının olmamasıdır. Bu da ortaya ciddi suallar çıxarır: Görəsən, Sahil Babayev sələfi Səlim Müslümovdan bu qədərmi çəkinir ki, onun yaxın qohumlarının adını çəkə bilmir?
Onu da xatırladaq ki, Əsgər Əsgərovla eyni vaxtda Səlim Müslümovun digər qohumları da nazirlik sistemindən uzaqlaşdırılıblar. Belə ki, Sahil Babayevin əmri ilə keçmiş nazir Səlim Müslümovun əmisi oğlu, nazirin müaşaviri Yalçın Müslümov, dayısının kürəkəni olan Dövlət Əmək Müfəttişliyinin rəisi Fuad Əlizadə də üç həftə əvvəl vəzifələrindən çıxarılıblar. Ancaq nazirlik bunların işdən çıxarılmasını elə təqdim elədi ki, sanki onlar buranı bəyənməyib, işdən özləri gediblər.
“Reytinq”in məlumatına görə, nazirlik adıçəkilənlərin öz ərizələri ilə vəzifədən azad edildiklərini bildirsə də, vəziyyət tamaməksinədir. Daha dəqiqi, adıçəkilənlərin S. Müslümovun sayəsində belə yüksək vəzifəyə gətirildikləri şübhə doğurmadığı kimi, S. Babayevin də onlarla gec-tez yollarını ayıracağı gözlənilən idi. Mümkündür ki, onlara işdən getmələri üçün ərizələrini yazmaq təklifi edilib və onlar da daha ağır vəziyyətlə üzləşməmək üçün postlarını tərk etmək məcburiyyətində qalıblar.
Məlumatda o da bildirilir ki, nazirin əmri iə vəzifədən azad edilən Fuad Əlizadənin yerinə Sahil Babayevin böyük inam bəslədiyi müşaviri Elman Cəfərov gətirilib. Digər vəzifələrə isə hələlik təyinat aparılmayıb.
Məlumata görə, ƏƏSMN və onun strukturlarında sabiq nazirin kifayət qədər ciddi vəzifələr tutan qohum və kadrları var. Onların arasında Səlim Müslümovun qayını, DSMF-nin Hərbi qulluqçular və xüsusi rütbəli şəxslərlə iş idarəsinin rəisi Ağalar Xasayevdən tutmuş, nazirliyin İqtisadiyyat şöbəsinin müdiri Şəlalə Cəfərova və hazırda nazirin köməkçisi olan İqbal Hacıyevə qədər şəxslər var:
“Sabiq nazirin qohumlarını vəzifəyə yerləşdirməsinə xüsusi şərh verməyə ehtiyac yoxdur. Çünki bu, “Korrupsiya haqqına” qanuna zidd olmaqla yanaşı, izahı ortada olan məsələdir. Lakin faktiki olaraq, bu saat da nazirlikdə Səlim Müslümova sadiq olan, onun sayəsində sürətli yüksəliş qazanmış kadrlar az deyil. Onların arasında Şəlalə Cəfərovanın və yeni nazirin köməkçisi İqbal Hacıyevin adını da çəkmək olar”.
Mənbəmiz qeyd edib ki, hazırda S. Babayevin də köməkçisi vəzifəsini yerinə yetirən İqbal Hacıyev Səlim Müslümov DSMF-nin rəhbəri olandan onunla birgə çalışıb.
Məlumata görə, nazir Sahil Babayev ƏƏSMN və onun strukturlarına kök salmış “köhnə qvardiya” ilə tələsik vidalaşmaq niyyətində deyil. O, sanki Səlim Müslümov və hazırda nazirlikdə kök salmış bəzi nazir müavinlərindən qorxur, onlarla üz-üzə gəlmək istəmir. Məlumatlı mənbə isə iddia edir ki, S. Babayev bu prosesi ilin sonuna qədər, mərhələlərlə həll etmək istəyir:
“Nazirə yaxın şəxslər bildirirlər ki, ilin sonuna qədər DSMF-nin direktoru Zakir Babayev başda olmaqla, nazir müavini İdris İsayevə qədər bir çox şəxslər nazirliklə vidalaşmalı olacaqlar. Açığı, mən buna o qədər də inanmıram. Çünki Səlim Müslümovun əmisi oğlu Yalçın, bacısının həyat yoldaşı Əsgər, dayısının kürəkəni Fuad işdən azad edildikdən sonra ƏƏSMN-nin mətbuat xidməti o qədər qorxaq açıqlama verdi ki… Bununla sanki yeni naziri qətiyyətsiz şəxs kimi təqdim etməyə çalışdılar. Adıçəkilənlər işdən azad edilsələr də, rəsmi açıqlamada bildirildi ki, nazir onları işdən azad etməyib, yəni onlar könüllü olaraq vəzifədən kənarlaşıblar. Lap deyək ki, Səlim Müslümovun qohumları könüllü getmək istəyib, siz niyə dərhal ərizənin üstünü yazıb, əmrləşdirdiniz?”.
Məlumatlı şəxs deyir ki, S. Babayev indiyədək vəzifədən çıxardığı şəxslərin heç birinin yerinə də rəsmi təyinat apara bilməyib: “Nazirlik və ona bağlı olan qurumlarda xeyli şöbə müdirləri işdən azad edilib. Amma həmin şöbələrə müdir təyinatı olmayıb. Hamısını ya müavinləri, ya da sektor müdirləri əvəz edir. Nazirlikdəki şöbə müdirləri bir yana, Sahil Babayev heç DSMF-nin rayon şöbələrinə də müdir təyin edə bilmir. Nöqsanlara görə vəzifədən qovulduqları deyilən şöbə müdirlərini ya müavinləri, ya da sektor müdirləri əvəz edir”.
Məsələnin ən maraqlı tərəfi yeni nazirin üç aydır nazirliyin Aparat rəhbəri vəzifəsinə də təyinatı gerçəkləşdirə bilməməsidir:
“May ayının əvvəlində Anar Əliyev nazirin müaşviri təyin edilib və Aparat rəhbəri vəzifəsinin müvəqqəti icrası ona tapşırılıb. Eyni zamanda Fazil Talıbovun nazirliyin ictiamiyyətlə əlaqələr şöbəsinin müdiri təyin olunması barədə KİV-lərdə yazılanlar doğru deyil. O, həmin şöbəyə əslində müdir müavin təyin edilib, sadəcə, şöbə müdiri vəzifəsini icra edir. Yəni Sahil Babayevin ənənəvi taktikası burada da öz sözünü deyib ”.
Qanuna görə bəzi vəzifələrə təyin olunmaq üçün mütləq dövlət qulluğuna qəbul üçün imtahan verilməli, qazanılan nəticəyə əsasən təyinat ola bilər. Mənbəmiz isə deyir ki, nazir S. Babayevin Dövlət İmtahan Mərkəzinə hazırda nə qədər vakant yerlə bağlı sifariş verdiyi dəqiq məlum deyil: 
“Bildiyimə görə, hazırda nazirlikdəki şöbə müdirləri vəzifəsi haqda heç yerəməlumat verilməyib. O, ya müqavilə ilə, ya da əvəzedici təyinatlar verməklə nazirliyi zamanın öhdəsinə buraxıb. Yəni bu gün ƏƏSMN faktiki belə idarə olunur, iddia olunduğu kimi heç bir ciddi dəyişiklik və islahat olmayıb, heç işartıları da görünmür”.
Nazirlikdəki mənbə iddia edir ki, S. Babayevin qarşısındakı ən ciddi sədd nazir müavini İlqar Rəhimov ola bilər:
“Düzdür, indi çoxlarını maraqlandıran əsas məsələ odur ki, görəsən, bu sahədə müsbət dəyişiklikləri insanlar nə vaxt görəbiləcəklər? Amma hazırki reallıqlar bunun asanlıqla baş tutmayacağını deməyə əsas verir. Nazirlikdən məlumatı olanlar bilirlər ki, müsbət dəyişikliklərin qarşısını alan əsas qüvvələr təmizlənməyənə qədər, bu prosesi aparmaq çox çətin olacaq. Məsələn, nazir müavini İlqar Rəhimovu götürək. O, 1999-cu ildənazir müavini təyin olunduqdan sonra bu sahə sanki tilsimədüşüb. İlqar Rəhimov nazir müavini olsa da, faktiki olaraq bütün nazirlərin dövründə özünə nazir səlahyyətləri təmin etməyə çalışıb. Hələ illər öncə ölkə KİV-ləri yazırdı ki, respublikada ünvanlı sosial yardım sistemində korrupsiya şəbəkəsi yaradıb onu gözdən salan məhz İlqar Rəhimovdur. 2006-ci ildə biznes sahəsindən nazir vəzifəsinə gələn Füzuli Ələkbərov təyinatının ilk aylarında “mənim kasıbların pulunda gözüm yoxdur, bu sahədətam şəffaflıq təmin olunmalıdır”,- desə də, İlqar Rəhimov Füzuli Ələkbərovun sistemdən az məlumatlı olmasından və işçilərin əksəriyyətini yaxşı tanımadığından istifadə edərək, ünvanlı sosial yardım sistemində özünün şəbəkəsini qurdu. 2011-ci ilə qədər bu sistemi öz şəbəkəsi ilə yönəltdi. 2011-ci ildə bu sahədə vəziyyət rüsvayçı duruma çatdıqda isə Füzuli Ələkbərov İlqar Rəhimovla toqquşdu və nəticədə Rəhimovu güncə sıxaraq onu bu sistemin başından çəkilməyə məcbur edə bildi. ƏƏSMN-in bütün köhnə işçiləri də bilir ki, məhz həmin dövrdən sonra ünvanlı sosial yardımda rüşvət faktoru ciddi şəkildə aradan qalxmağa başladı.
Əgər dəqiq araşdırma aparılsa, məlum olar ki, 2006-2011-ci illərdə ünvanlı sosial yardım sistemindən yığılan rüşvətin 80-90 faizinin məhz İlqar Rəhimov və şəbəkəsinə bağlı olduğu üzə çıxar. Həmin dövrlərdə İlqar Rəhimov özünün qurduğu korrupsiya şəbəkəsinə Yaşar adlı şəxsi rəhbər təyin edərək, bütün idarə müdirlərini onunla hesablaşdırıb. Təsadüfi deyil ki, İlqar Rəhimov topladığı milyonlar hesabına hazırda Bakıda marketlər və restoranlar şəbəkəsinə malikdir. Amma onun adı belə məsələlərdə az hallandı və məsuliyyət o vaxtkı nazir Füzuli Əlkəkbərovun üzərinə qoyuldu. Məncə, Rəhimovun fəaliyyətini araşdırmağın zamanı çatıb.
İlqar Rəhimov indi də nazirlikdə nüfuz savaşına başlayıb. Onun yeni nazirə də müsbət işlər görmək imkanı yaradacağına inanmıram. Hətta bir neçə məclisdə onun “Məni heç bir nazir işdən çıxartdıra bilməyib, bunun da imkanı xaricindədir”,- dediyi bildirilir. Ona görə də, nazirlikdə çalışan bir çox şəxslərin fikrincə,əgər İlqar Rəhimova yeri göstərilməsə, çətin ki, bu sistemdə müsbətə doğru dəyişikliklər baş versin.
Görəsən, S. Babayev sələflərindən fərqli olaraq, İ. Rəhimovla bacaracaqmı?”.