Nemət Pənahlı arxivini açacaq: “XALQ BÜTÜN HƏQİQƏTLƏRİ BİLMƏLİDİR”

Nemət Pənahlı arxivini açacaq: “Xalq bütün həqiqətləri bilməlidir”

Milli Azadlıq Hərəkatının rəhbərlərindən olan, keçmiş siyasi məhbus Nemət Pənahlı meydan hərəkatı və 20 yanvar hadisələri ilə bağlı arxivini açacaq. 

Bu barədə N.Pənahlı musavat.com-a açıqlamasında bildirib. 
O, deyib ki, hazırda arxivində həmin dövrün hadisələrini əks etdirən 300-dən çox videokaset var və tezliklə onları köçürüb, internet üzərindən yayımlayacaq ki, xalq tarixi həqiqətləri görsün:“Azadlığa çıxandan sonra əsas məqsədim videoarxivimi internetə yükləyib, cəmiyyətə həqiqəti çatdırmaqdır. Çünki, 20-30 illik fəaliyyətimlə bağlı bütün məlumatlar cəmiyyətə təhrif olunmuş formada çatdırılıb. 1988-ci ilin meydan hadisələrindən 27 il keçib. Meydan hərəkatı ilə bağlı kinostudiya 55 dəqiqəlik film çəkmişdi. Bu günə qədər o xalqdan gizlədilib. “20 Yanvar” hadisəsindən keçən bu müddət ərzində məni daim ittiham ediblər. Əleyhimə şayiə-böhtan yayıblar ki, guya Nemət Pənahlı hadisələr zamanı qaçdı, gizləndi. Halbuki, Şəhidlər Xiyabanının yerinin seçilməsindən tutmuş, şəhidlərin dəfninə qədər hamısına özüm rəhbərlik etmişəm. Əslində qaçıb, gizlənənlər başqaları olublar. Dəfndən sonra mən 4 saat tankın, topun altında mitinq keçirmişəm. Bunun videogörüntüləri də var, ancaq bugünə qədər millətdən gizlədiblər. Bu videolar mənim arxivimdə də var”.
Nemət Pənahlı onun “20 Yanvar” hadisələri zamanı göstərdiyi fəaliyyətin efirdən gizlədildiyini vurğuladı:“20 Yanvar” hadisəsi ilə bağlı videolar göstəriləndə bizim kölgəmiz də göstərilmir. İndi internetin verdiyi imkanlar var ki, mən bu videoları yükləyim, xalqa təqdim edim. Məndə 300-dən çox kaset var. Əksəriyyəti köhnə lentlərdədir. Onları köçürməyə də zaman lazımdır. Tezliklə bu işə başlamaq istəyirəm ki, xalq həqiqəti, reallıqları görsün. Bu günə qədər həm hakimiyyət, həm də müxalifət tərəfindən tarix təhrif edilib. Hərə öz istədiyi kimi tarixi saxtalaşdırıb, cəmiyyətə təqdim edib. Bu günki gənclər isə onlara göstərilən o saxta faktları bilirlər, həqiqəti bilmirlər. Bunun üçün ən gözəl yol faktları ortaya qoymaqdır”. 






Fikirlər