«Kürdlər bizim müttəfiqimizdir» – ALEKSEY PUŞKOV
Pusiyalı siyasətçi ABŞ-a da ismarıc göndərib: «ABŞ da bu məsələdə ardıcıl movqedə dayanmalı və türklərə izah etməlidir ki, İLİD-lə mübarizədə kürdlər bizim müttəfiqlərimizdir». Puşkov həm də qeyd edib ki, kürdlər də Suriya üzrə danışıqlara buraxılmalıdırlar. Çünki onlar Suriya əhalisinin bir hissəsi olmaqla bərabər, həm də mötədil müxalifətdən fərqli olaraq, İslam Dövləti ilə fəal şəkildə mübarizə aparırlar: «Bölgədəki 50-60 minlik kürd silahlı dəstələri çox ciddi silahlı gücdür». Yayılan xəbərlərə görə, cari həftənin əvvəlindən kürdlərin başlayan hücumları (bu hücumlar beynəlxalq koalisiyanın hərbi hava qüvvələri tərəfindən havadan dəstəklənir) nəticəsində bölgənin 50 yaşayış məntəqəsi tutulub. Burada kürdlər ötən ilin oktyabrında yaradılmış «Demokratik Suriya gücləri» (DSG) adlı silahlı birləşmələrin tərkibində fəaliyyət göstərirlər. Məlum olduğu kimi, özünün sərhəd-ərazi təhlükəsizliyi, qaçqın və terror problemi mülahizələrindən dolayı son günlər Türkiyə dövləti Suriya kürdlərinin mövqelərini atəşə tutur. Belə ki, Türkiyə hökuməti buradakı kürd silahlı dəstələrini PKK-nın bir qolu olaraq, terrorçu dəstələr elan edib. Xatırladaq ki, bir qədər bundan əvvəl ABŞ Dövlət Departamenti Türkiyəni Suriya kürdlərinin mövqelərinə endirilən artilleriya atəşlərini dayandırmağa çağırmışdı. Bundan başqa, ABŞ kürdlərin özlərindən də Türkiyə sərhədlərinə yaxın yeni əraziləri nəzarətə götürməməyi xahiş etmişdi. Beləliklə, açıq-aydın görünür ki, indiki halda Suriyada cərəyan edən proseslərə və kürd məsələsinə münasibətdə, ABŞ, əslində Türkiyə ilə yox, Rusiya ilə müttəfiqlik nümayiş etdirir – cüzi fərqlə… (AzPolitika.info)
Rusiya KİV-nin yaydığı məlumata görə, Rusiya Dövlət Duması Beynəlxalq əlaqələr komitəsinin sədri Aleksey Puşkov «Kommersant FM» radiosuna verdiyi müsahibədə qeyd edib ki, kürdlər Suriyanın «İslam Dövləti»nə qarşı apardığı mübarizədə və ölkənin şimal-şərq ərazilərinin azad edilməsində mühüm rol oynaya bilərlər.
«Mənim zənnimcə, kürdlər Suriyanın şimal-şərq ərazilərinin İraq və Levant İslam Dövlətinin (İLİD) işğalından azad edilməsində çox ciddi rol oynamaq gücündədirlər»-deyə, o, bəyan edib.
