Manatın kursu düşdü,dollar satışı dayandırıldı -Bakıda, FOTO
Dünən Azərbaycan Mərkəzi Bankının (AMB) sədri Elman Rüstəmovun manatın kursunun düşəcəyi barədəki xəbərdarlığından sonra bu gündən Bakıda dollar qıtlığı yaşanır.
Bakı sakinləri kütləvi şəkildə valyutadəyişmə məntəqələrinə yollanaraq milli pulu ABŞ dollarına dəyişməyə çalışırlar.
Virtualaz.org saytının müxbiri bu dəqiqələrdə Bakının mərkəzi küçələrində olan valyutadəyişmə məntəqələrində olub.
Əməkdaşımız xəbər verir ki, 28 May küçəsində yerləşən valyutadəyişmə məntəqələrində bu dəqiqələrdə ABŞ dolları satılmır. Səhər saatlarında dollar satılsa da artıq satış dayandırılıb. Xeyli sayda insan valyutadəyişmə məntəqələrində dolların satılacağını gözləyir.
Bəzi valyutadəyişmə məntəqələrindən isə alıcılara bildirilir ki, günün ikinci yarısından sonra dollar satışının olacağı gözlənilir.
Dollar tapmayan Bakı sakinləri avro almağa da üstünlük verirlər. Bəzi valyutadəyişmə məntəqələrində avro tapmaq mümkündür.
Dollar almağa çalışan Bakı sakinləri deyirlər ki, digər valyutadəyişmə məntəqələri də dollar satışını dayandırıb.
Qeyd edək ki, böyük ajiotajdan sonra banklar belə dollar satışını dayandırıb.
“Atabank”ın Rixard Zorge küçəsində olan filialında da dollar yoxdur.
Puşkin, 28 May küçələrindəki digər bankların filiallarında da dollar satışı dayandırılıb.
