19.02.2014. - “Yanukoviçin əli qana batıb”-İsveçli nazir
Ukraynada onlarla adamın həlak olduğu qanlı toqquşmalardan sonra prezident Viktor Yanukoviç beynəlxalq legitimliyini sürətlə itirməkdədir.
AzerTaym.az saytı xəbər verir ki, İsveçin xarici işlər naziri Karl Bildt özünün Twitter səhifəsində Ukraynada onlarla adamın həlak olmasına görə məsuliyyəti birbaşa prezident Viktor Yanukoviçin daşıdığını yazıb.
“Birbaşa demək lazımdır: Kiyevdəki ölümlərə və zorakılığa görə məsuliyyət tamamilə prezident Yanukoviçin çiyinlərindədir. Onun əlləri qana batıb” - deyə nazir bildirib.
ABŞ-ın Ukraynadakı səfiri Ceffri Payet də prezident Yanukoviçin ölkədə baş verənlərə görə məsuliyyət daşıdığını bildirib. Səfir bəyan edib ki, ABŞ-ın mövqeyinə görə zorakılıqlara və qətllərə görə prezident məsuliyyət daşıyır.
“Freedom House” beynəlxalq insan haqları təşkilatı da Ukrayna prezidentinin legitimliyini itirdiyini, ABŞ və Avropa İttifaqının ona qarşı təcili sanksiyalar tətbiq etməli olduğunu bildirib.
