İşıq pulu ilə bağlı yaranan narazılığa aydınlıq gətirildi

"Azərişıq" ASC-nin mətbuat katibi Tanrıverdi Mustafayev abonentlərə artıq işıq pulu gəlməsi ilə bağlı məsələyə aydınlıq gətirib.

O bildirib ki, göstəricilər hər bir abonentin elektrik sayğacından oxunaraq təqdim olunur.

"Elektrik enerjisini sayğac tənzimləyir. Sayğaclarda əvvəlki və son göstərici qeyd olunur. Abonentlər nə qədər elektrik enerjisi işlədibsə, o qədər də pul yazılıb. Son vaxtlar havalar isti keçdiyi üçün abonentlər kondisionerlədən istifadə edirlər. Bu, işıq pulunun əvvəlki aylardan fərqli olaraq çox yazılmasına səbəb ola bilər. Hər kəs öz sayğacına baxır, bütün rəqəmlər orada qeyd olunur. Özləri də hesablaya bilərlər", - deyə Tanrıverdi Mustafayev qeyd edib.