Məmurun “AVTOŞ” oğlu sabah azad ediləcək
Nicat Abdullayev barəsində 20 günlük inzibati həbs müddəti bitir 
21-11-202420-11-202419-11-2024
İyunun 9-da Xarici İşlər Nazirliyi turizm şöbəsinin müdiri Nurpaşa Abdullayevin “avtoş”luğa görə həbs olunan oğlu Nicat Abdullayevə verilmiş cəza müddəti bitir. Buna baxmayaraq, Nicat Abdullayevin “KIA” markalı maşınla şəhərin mərkəzində “avtoş”luğu, 20-yə yaxın yol polisi əməkdaşının təqibindən sonra onun süni tıxac yaratmaqla saxlanılması haqda müzakirələr hələ də səngiməyib.
Sükan arxasına spirtli içki qəbul edərək əyləşən Nicat Abdullayevin cəmiyyətə açıqca hörmətsizlik ifadə olunan hərəkətləri, ədalı davranışı unudulmur. Mayın 20-də saxlanıldıqdan sonra Nərimanov Rayon Məhkəməsinə aparılan N.Abdullayev barəsində 20 gün müddətinə inzibati həbs cəzası haqda qərar verilib.
Onu polis konvoyunun nəzarəti altında DİN-in İnzibati Həbs Olunanların Saxlanma Məntəqəsinə göndəriblər. Mətbuatda Nicat Abdullayevin təcridxanaya göndərilərkən polislərlə dialoqu yayılıb. Məmur oğlu əməlini sıradan bir hal hesab edib. Özünü adam öldürənlərlə müqayisə edərək əməlinə haqq qazandırmağa çalışıb. Bu dialoq cəmiyyət üzvlərinin Nicat Abdullayevə kəskin münasibətinin formalaşmasına, barəsində ən sərt tənqidi fikirlərin ortaya çıxmasına səbəb olub.
N.Abdullayevin “avtoş”luğunu yaddaqalan, ciddi müzakirə mövzusuna çevirən məqamlardan biri də atası, XİN-də şöbə müdiri olan Nurpaşa Abdullayevin davranışları oldu.
Oğlunun saxlama yerinə gedən şöbə müdiri orada qalmaqal yaratmışdı. Oğluna su ötürmək istəyən ata Abdullayevə deyiblər ki, su saxlanılan şəxslərə verildiyindən onun gətirdiyi suya ehtiyac yoxdur. Bu sözdən sonra məmurun özündən çıxdığı, nəzarətçiləri hədələdiyi deyilir. Olaydan sonra mətbuat Nurpaşa Abdullayevin kimliyini araşdırıb. Məlum olub ki, o, həm Xarici İşlər Nazirliyində şöbə rəisidir, həm də bazar sahibidir. N.Paşayev 3-cü mikrorayon bazarının sahiblərindən biridir. Qanunla biznesmenin dövlət məmuru olması yasaqdır. Amma N.Abdullayevə münasibətdə qanunun bu tələbi keçərli olmayıb. 3-cü mikrorayon bazarının sahiblərindən biri olan N.Abdullayevi bazarkom olmasına rəğmən XİN-də işə götürüblər...
Məmur övladının cəmiyyətə qarşı aqressiv hərəkəti, laqeyd münasibəti ilə ölkə prezidentinin məmurlara xitablarındakı fikirlər uzlaşmadığından Nurpaşa Abdullayevin tezliklə XİN-dən uzaqlaşdırılacağı gözlənilirdi. Amma nədənsə bu baş vermədi.
Yasa salaq ki, prezident çıxışlarında məmurların övladlarının hərəkətlərinə görə məsuliyyət daşıdıqlarını bir neçə dəfə xüsusi olaraq vurğulayıb.
Prezidentin çıxışlarından birindən sitat: “Harınlayırlar, qudururlar, heç kimi saymırlar! Vəzifəli şəxslərin uşaqları qudurğanlıq edirlər, insanları təhqir edirlər, özlərini apara bilmirlər. Kim onlara bu statusu verib cəmiyyətdə?! Onların, necə deyərlər, güvəndiyi adamları mən təyin etmişəm vəzifəyə, mən də çıxaracağam lazım bildikdə. Əgər bir də bilsəm ki, kiminsə ailə üzvü haradasa xuliqanlıq edir, nadanlıq edir, özünü apara bilmir, o adam həbs ediləcək, atası işdən qovulacaqdır. Bunu hamı bilsin! Şəhər küçələrini yarış meydanına çevirənlər də bilsinlər! Hamısı həbs ediləcək! Vəssalam! Daxili işlər naziri gündə mənə məlumat verəcəkdir. Avtoxuliqan, özünü apara bilməyən, ictimai asayişi pozan, qanunlara əməl etməyən, adət-ənənələrimizi yerə vuran hər bir kəs cəzalandırılacaqdır. Onu hamı bilsin!”.
Maraqlıdır ki, prezidentin çıxışlarından sonra bir neçə məmur övladının avtoxuliqanlığına görə vəzifəsindən qovulub. Nurpaşa Abdullayevə fərqli münasibətin kökündə hansı amilin dayandığı isə bilinmir.
Fikirlər
-
Reklam
-
Əsas xəbərlər
