Yaxın vaxtlarda prezident İlham Əliyev tərəfindən əfv sərəncamı imzalanacağı gözlənilir. Artıq bir neçə dəfə Əfv Məsələləri Komissiyasının iclasları da keçirilib. Komissiya üzvləri, hüquq müdafiəçiləri, hökumət nümayəndələri tezliklə yüzlərlə şəxsin ailəsinə qovuşacağını vurğulayır.

Mətbuat Şurasının sədri Əflatun Amaşov isə həbsdə olan jurnalistlərə diqqət yönəldib. Ə.Amaşov Azərbaycan jurnalistlərinin VII qurultayında çıxışı zamanı həbsdə olan jurnalistlərin cəzalarının çəkilməmiş hissəsindən azad edilməsi üçün ölkə başçısına müraciət ünvanlamağın vacibliyini bildirib. Sədr reallaşacağı təqdirdə bunun humanist addım olacağını vurğulayıb.

 Modern.az hazırda həbsdə olan jurnalist Əfqan Muxtarlı və blogger Mehman Hüseynovun əfv ərizəsi yazıb-yazmadığı ilə maraqlanıb.

Onların hüquqlarını müdafiə edən vəkil Elçin Sadıqov saytımıza deyib ki, Əfqan Muxtarlının qanuni cəhətdən əfvə düşməsi mümkün deyil:

“Ona görə ki, onun barəsəindəki hökm qanuni qüvvəsinə minməyib”.

 E.Sadıqov bildirib ki, ümumilikdə Ə.Muxtarlı və M.Hüseynov əfv ərizəsi yazmayıblar.

Ə.Muxtarlıya Cinayət Məcəlləsinin 318-ci (Dövlət sərhədini qanunsuz olaraq keçmə), 206-cı (qaçaqmalçılıq) və 315-ci (Hakimiyyət nümayəndəsinə qarşı müqavimət göstərmə və ya zor tətbiq etmə) maddələri ilə ittiham irəli sürülüb. Balakən Rayon Məhkəməsinin qərarına əsasən, ona 6 il iş kəsilib.

Mehman Hüseynov isə CM-nin 147.2-ci maddəsilə təqsirli bilinərək 2 il müddətinə azadlıqdan məhrum etmə cəzasına məhkum edilib.