Fransa Makronun timsalında belə görünür, Cənubi Qafqazda yenidən gərginlik ocağı yaratmaqda maraqlıdır. Ən azından onun Ermənistanı silahlandırmaqda davam etməsi bunu əsas verir. Fransa Ermənistana satdığı silah-sursatın nomenklaturasını genişləndirir, Ermənistan rəhbərliyini revanşizmə təşviq edir.

İyunun 17-də Ermənistanın müdafiə naziri Suren Papikyanın Parisə səfəri fonunda iki ölkə arasında “CAESAR” özüyeriyən artilleriya sistemlərinin alınmasına dair müqavilə imzalanıb.

Bundan başqa, səfər zamanı Ermənistanla Fransa-Almaniya müştərək silah konserni olan KNDS arasında hərbi-texniki əməkdaşlığa dair müqavilə imzalanıb.

Fransa bu silahları satmaqla Ermənistanı yeni təxribatlara hazırlamaq niyyətini açıq şəkildə nümayiş etdirib.

Fransa niyə təxribat planlarından əl çəkmir?

Mövzu ilə bağlı Bizim.Media-ya açıqlamasında Milli Məclisin deputatı Aydın Mirzəzadə bildirib ki, Fransa bu hərəkətlərilə Ermənistanı yenidən müharibəyə sövq etmək istədiyini ortaya qoyur:

“Amma burada döyüşən fransız deyil, erməni əsgəri olacaq. Belə olan halda zərbələr də Fransaya yox, Ermənistana dəyəcək. İrəvan Azərbaycanla sülh üzərində düşünməlidir, nəinki Fransanın qurduğu çiknin oyunlarda iştirakda məmnunluq duymaq”.

Deputat qeyd edib ki, əslində Fransanın verdiyi silahlar Ermənistanın hərbi cəhətdən güclənməsində elə bir əsaslı rol oynamır:

“Çünki ordu çoxmilyardlıq vəsait tələb edən strukturdur. Fransanın etdiyi isə cəmi bir neçə yüz milyon dollar məsələsidir. Onun da bir hissəsini Fransa Ermənistana kredit şəklində verir ki, İrəvan vaxtı çatanda onu qaytarmalıdır. Deməli, Ermənistan özü bilmədən borc tələsinə düşür.

İkincisi, Fransanın Ermənistana verdiyi silahlardan daha güclüsü Azərbaycanda var.

Azərbaycan dəfələrlə rəsmi şəkildə bildirib ki, Ermənistan ölkəmizə təhlükə yaradarsa, layiqli cavabını alacaq. Paris isə Bakının bu xəbərdarlığını nəzərə almaq istəmir. Çünki özü regiondan kənardadır, sabah nə olacaqsa, Ermənistana olacaq və Fransa bundan heç nə itirməyəcək”.

Həmsöhbətimizə görə, Fransa hakimiyyətinin Azərbaycana qarşı siyasi təxribatı sonda Fransanın özünə ziyan vuracaq:

“Fransa belə olan halda Azərbaycanla çoxmilyardlıq kontraktlardan məhrum olur, beynəlxalq birlikdə nüfuzdan düşür”.

Deputatın fikrincə, Parisin vaxtaşırı Ermənistana silah verilməsi barədə məlumatlar yayması siyasi reklam xarakteri daşıyır:

“Bu yolla Fransa özünü güc, söz sahibi kimi göstərmək istəyir. Ancaq tarix sübut edib ki, Fransanın etdiklərinin zərbəsi ilk növbədə özünə qayıdır”.