34 ildə ilk dəfə Xankəndidə 20 Yanvar şəhidlərinin xatirəsi anıldı (FOTO/VİDEO)

 

34 ildə ilk dəfə Xankəndidə 20 Yanvar şəhidlərinin xatirəsi 1 dəqiqəlik sükutla yad edilib.
AzerTaym.az qaynarinfo-ya istinadən xəbər verir ki, Daxili İşlər Nazirliyi sükut anının görüntülərini yayıb.
Xatırladaq ki, 2023-cü ilin sentyabrında antiterror əməliyyatları ilə Xankəndi şəhəri erməni separatçılarından tamamilə təmizlənib. Azərbaycan Prezidenti İlham Əliyev oktyabrın 15-də Xankəndi şəhərində Azərbaycan Respublikasının Dövlət Bayrağını ucaldıb.
Qeyd edək ki, bu gün Azərbaycan tarixinə Qanlı Yanvar faciəsi kimi daxil olmuş 1990-cı il 20 Yanvar hadisələrinin növbəti - 34-cü ildönümüdür. 1990-cı il yanvarın 19-dan 20-nə keçən gecə birbaşa Sovet İttifaqı Kommunist Partiyası Mərkəzi Komitəsinin baş katibi Mixail Qorbaçovun əmri ilə SSRİ Müdafiə Nazirliyi, Dövlət Təhlükəsizlik Komitəsi və Daxili İşlər Nazirliyinin qoşun hissələri Bakıya və Azərbaycanın bir neçə rayonuna yeridilib, dinc əhali ağır texnikadan və müxtəlif tipli silahlardan atəşə tutularaq kütləvi qətlə yetirilib.
Fövqəladə vəziyyətin tətbiqi əhaliyə elan olunanadək hərbi qulluqçular 82 nəfəri amansızcasına qətlə yetirib, 20 nəfəri ölümcül yaralayıb. Fövqəladə vəziyyət elan edildikdən sonra isə bir neçə gün ərzində Bakı şəhərində 21 nəfər öldürülüb. Fövqəladə vəziyyətin elan olunmadığı rayon və şəhərlərdə - yanvarın 25-də Neftçalada və yanvarın 26-da Lənkəranda daha 8 nəfər qətlə yetirilib. Beləliklə, qoşunların qanunsuz yeridilməsi nəticəsində Bakıda və ətraf rayonlarında 147 nəfər öldürülüb, 744 nəfər yaralanıb.





Bənzər xəbərlər
  • Türkiyə XİN Azərbaycana başsağlığı
  • Şəhidlərin xatirəsi bir dəqiqəlik sükutla yad olundu
  • 20 YANVAR faciəsindən 34 il ötür
  • 20 Yanvar şəhidləri bir dəqiqəlik
  • 20 yanvar faciəsindən 25 il ötür

    • Fikirlər