09.01.2014 11:25 Aybəniz Haşımova qızının nişanından danışdı (FOTO) Əməkdar artist: "İnşallah övladımın nişan, toy xəbərini özüm deyəcəm"
Əməkdar artist Aybəniz Haşımova qızı Aynişan ilə müğənni Mirkamil Kamilovun nişanlanması haqda yayılan xəbərlərə aydınlıq gətirib.
AzerTaym.az-ın ANS-ə istinadən verdiyi məlumata görə, Mirkamil ürək əməliyyatı keçirdikdən sonra medianın gündəminə gələn bu məsələ hər kəsin marağına səbəb olub. Aynişanın anası əməkdar artist isə öz növbəsində bu məsələyə sosial şəbəkədə münasibət bildirib:
“Əziz və sevimli dostlarım, əzizlərim, bircə kəlmə ilə deyəcəm və xahiş edirəm heç kəs məni bu məsələylə bağlı narahat etməsin. Mən kiminsə balasının dar günündə dalınca qaçıramsa, bu mənim insanlara, yaxınlarıma olan məhəbbətim, sədaqətimdir. Bunu bizdən Allah istəyir və mən də belə olmağa çalışıram, hər kəsi də belə olmağa çağırıram. Mənim övladımın nişanını da, toyunu da inşallah görəcəksiniz. Hər şeyin vaxtı, qisməti, zamanı var. Olmayan sözləri düzəldib, qoşub, yaymaq lazım deyil. Övladımın qismətinin kim olacağını yalnız Allah bilir. Qoy Allah da hamının balasını qorusun. İnşallah övladımın nişan, toy xəbərini özüm deyəcəm. Saxta məlumat yayanlara isə demək istəyirəm ki, bilmədiyinizi nə danışın, nə də yazın. Qələm çəkən biz deyilik, Allahdır”.
