“Bu seçki Ukrayna üçün təhlükənin maksimum nöqtəsidir”

Donalda Tramp ABŞ-də keçirilən prezident seçkilərində qalib gəlsə, noyabrın 6-da Vladimir Putinə zəng edə, Ukrayna ilə bağlı danışıqlar isə 2025-ci ilin ilk aylarında başlaya bilər.

“AzPolitika” xəbər verir ki, “CNBC” hadisələrin məhz bu cür cərəyan edəcəyinə dair məlumat yayıb.

Kanalın materialında qeyd olunur ki, Ukrayna ABŞ-dəki səsvermənin gedişini böyük diqqətlə izləyir. Çünki Tramp administrasiyası Ukraynaya hərbi yardım göstərilməsinin əleyhinə ola bilər ki, bu da onun Rusiya ilə mübarizəni davam etdirmək qabiliyyətini əhəmiyyətli dərəcədə zəiflədər. Bununla belə, çox güman ki, Ukraynanı sona qədər dəstəkləyəcəyinə söz vermiş Kamala Harrisin administrasiyası belə, ABŞ qanunvericilərini Ukraynaya əhəmiyyətli dərəcədə daha çox maliyyə dəstəyi verməyə razı sala bilməyəcək.

Bildirilir ki, Ukrayna üçün həlledici amil seçkilərdən sonra Konqresdə demokratların, yoxsa respublikaçıların üstünlük təşkil edəcəyidir. Donald Tramp dəfələrlə Kiyevə hərbi yardımı kəsəcəyini və seçiləndən sonra 24 saat ərzində müharibəni dayandıracağını bildirib. Təhlilçilər deyirlər ki, Tramp çox güman ki, maliyyələşdirmənin qarşısını almağı müharibəni dayandırmağa məcbur etmək üçün bir yol kimi görür. Onun vitse-prezidenti J.D.Vens isə Ukraynaya əlavə yardımın qəti əleyhinədir və iddia edir ki, Birləşmiş Ştatlar Kiyevi Rusiya ilə sülh razılaşması əldə etməyə təşviq etməli, ərazi güzəştlərinə getməyə hazır olmalıdır.

Səsvermənin nəticəsindən asılı olmayaraq, analitiklər Ukraynanın Qərbin dəstəyinin azalması və qeyri-sabit gələcəklə üzləşəcəyini düşünürlər.

Məsələn, Böyük Britaniya Kral Birləşmiş Xidmətlər İnstitutunun baş mütəxəssisi Tim Uilsey bununla bağlı deyib: "ABŞ-dəki prezident seçkiləri Ukrayna üçün təhlükənin maksimum nöqtəsidir. Donald Trampın qələbəsi onun noyabrın 6-da Rusiya Prezidenti Vladimir Putinə zəng etməsinə səbəb ola bilər. İstənilən bu cür zəng 2025-ci ilin ilk aylarında münaqişənin danışıqlar yolu ilə həlli gözləntilərinə hesablanacaq”.

Onun sözlərinə görə, bundan sonra istənilən razılaşmada Ukrayna Prezidenti Volodimir Zelenskinin Rusiya tərəfindən işğal olunmuş Krımın və Donbassın geri qaytarılmasına nail olmaq və ya ölkəsinə vurduğu böyük itkilərə görə Rusiyadan kompensasiya almaq ehtimalı yoxdur. Həmçinin çox güman ki, danışıqlar yolu ilə nizamlanma Rusiya rəsmilərinin hərbi cinayətlərə görə məsuliyyət daşımamasını ehtiva edəcək: “Daha böyük zərbə o ola bilər ki, sülh sazişi Ukraynanın gələcək NATO üzvlüyünə son qoyacaq”.