21.08.2014- Bentley 337 min dollara avtomobil buraxır (FOTO)
Bentley şirkəti Pebbl-Biç Zəriflik müsabiqəsində yeni Continental GT3-R kupesinin Şimali Amerika debütünü təşkil edəcək.
ANS-in məlumatına görə, avtomobilin dünya premyerası bu yay Qudvud Sürət festivalında baş tutub. Britaniya markasının ən sürətli yol avtomobili Continental GT3 yarış maşını əsasında hazırlanıb. O 580-güclü 4.0 litrlik V8 mühərrik və səkkiz pilləli ZF avtomat ötürücü qutu ilə təchiz edilib. Bu aqreqatlarla kupe 0-100 km/saat sürətlənməni 3,8 saniyəyə yerinə yetirir. Avtomobilin idman kürsüləri dəri və alkantara ilə üzlənib. İnteryerin tərtibatında karbon taxmalardan və yaşıl aksentlərdən istifadə edilib.
İstehsalı planlaşdırılan 300 ədəd Bentley Continental GT3-R kupedən 99 nüsxəsi ABŞ bazarı üçün nəzərdə tutulub. Yeni model üçün sifarişlərin qəbulu 337 min dollardan başlayır. İlk alıcılar öz maşınlarını 2015-ci ilin əvvəlində alacaqlar.
