Oktyabrın 10-dan noyabrın 5-dək Bakıdakı “A.M.A.Y Holdinq” MMC-nin ticarət mərkəzində arıçılıq məhsullarının respublika sərgi-satış yarmarkası start götürəcək. 

Bu gün isə şəffaflığın təmin edilməsi məqsədi ilə yerlərin iqtisadi rayonlar üzrə və fərdi qaydada elektron püşkatması keçirilib.

Bu barədə Kənd Təsərrüfatı Nazirliyinin mətbuat xidmətinin rəhbəri Murtuzəli Hacıyev məlumat verib.

Nazirlik rəsmisi qeyd edib ki, yarmarkada 336 arıçı iştirak edəcək:

“Yarmarkada 130 tondan artıq arıçılıq məhsulu satışa çıxarılacaq. Ötən illə müqayisədə bu il həm arıçıların sayı, həm də arıçılıq məhsulları çoxdur”.

M.Hacıyev bildirib ki, Baytarlıq laboratoriyasının analizləri əsasında 20 tona yaxın balın standartlara uyğun olmadığı müəyyənləşib:

“Həmin məhsulların satışına icazə verilməyib”.

Satışa çıxarılacaq arıçılıq məhsullarının qiymətinə gəlincə, Kənd Təsərrüfatı Nazirliyinin Heyvandarlıq məhsullarının istehsalı, emalı, damazlıq işi və otlaqlar şöbəsinin müdiri Qalib Abduləliyev Modern.az-a bildirib ki, bunu arıçılar özü məyyən edəcək:

 “Qiymətlər sərbəstdir. Amma ümumilikdə yarmarkada satışa çıxarılacaq balın 1 kiloqramının 20-25 manat olacağı gözlənilir”.