İqtisadi əməkdaşlıq Təşkilatının (İƏT) İslamabad Sammitində Qırğızıstan Azərbaycan üçün mühüm əhəmiyyət daşıyan Ermənistan-Azərbaycan, Dağlıq Qarabağ münaqişəsilə bağlı qətnaməyə qoşulmayıb.

Məsələ ilə bağlı Modern.az-a danışan Milli Məclisin Mədəniyyət Komitəsinin sədri, Türkdilli Ölkələrin Parlament Assambleyasının  (TÜRKPA) üzvü Nizami Cəfərov deyib ki, Qırğızıstanın qətnaməyə qoşulmaması düzgün addım deyil.

“Bizim üçün birinci prinsip türk dünyasının birliyi məsələsidir. Gərək Qırğızıstan bu qətnaməyə qoşulaydı, çünki türk dünyasında Dağlıq Qarabağ problemi ilə bağlı məsələ əslində məlumdur. Hər halda biz onlara izah etməliyik ki, bu məsələdə ümumi mövqe mövcuddur və ona görə də məlumatsızlıqdan söhbət gedə bilməz.

Azərbaycanla Qırğızıstan arasındakı münasibətlər çox yüksək səviyyədədir. Mən inanmıram ki, hər hansı bir inciklik, anlaşılmazlıq bu münasibətlərə təsir etsin. Amma biz də öz mövqeyimizi bildirməliyik, bu qətnamənin vacibliyini bildirməliyik”.

İqtisadi əməkdaşlıq Təşkilatının 1985-ci ildə Pakistan, Türkiyə, İran tərəfindən qurulub. 1993-cü ildən Azərbaycan və 5 Orta Asiya respublikası bu quruma üzv olublar.

Bu il martın 1-də Pakistanda qurumun XIII sammiti keçirilib.