Bakı Apellyasiya Məhkəməsində dələduzluqda təqsirləndirilən keçmiş futbolçu Maşallah Əhmədovun apellyasiya şikayəti üzrə məhkəmə prosesi keçirib.

APA-nın məlumatına görə, hakim Faiq Qasımov sədrlik etdiyi prosesdə zərərçəkmiş Yusif Əzizov ona məxsus daşların bir hissəsinin M. Əhmədov tərəfindən “Sahil” MTK-ya verildiyini deyib.

İclasda M. Əhmədovla Y. Əzizov arasında mübahisə baş verib. M. Əhmədov Y. Əzizovu hədələyib.

Məhkəmə ona xəbərdarlıq edib. Hakim qeyd edib ki, bir də belə hal baş versə, proses M. Əhmədov olmadan davam etdiriləcək.

Daha sonra məhkəmə M. Əhmədovun da özünün iştirakı ilə “Sahil” MTK-da daşlara baxış keçirilməsi barədə qərar qəbul edib. Hakim bildirib ki, iyunun 2-də məhkəmə heyətinin iştirakı ilə “Sahil” MTK-da istifadə olunmuş daşlara baxış keçiriləcək.

Qeyd edək ki, Bakı Ağır Cinayətlər Məhkəməsinin hökmü ilə M. Əhmədov 8 il müddətinə azadlıqdan məhrum edilib.

M. Əhmədov 2015-ci il dekabrın 14-də Binəqədi rayon Polis İdarəsinin əməkdaşları tərəfindən saxlanılıb. İlkin məlumata görə, bizneslə məşğul olan “Neftçi”nin keçmiş futbolçusu bir neçə nəfərə 150 min manatdan artıq vəsaitə xaricdən daş plitə gətirəcəyini vəd edib. Lakin o, sözünə əməl etməyib və həmin şəxslərin pulunu qaytarmayıb. Binəqədi rayon Məhkəməsi M. Əhmədov barəsində ev dustaqlığı ilə bağlı qərar çıxarsa da, Bakı Ağır Cinayətlər Məhkəməsi onun 8 il azadlıqdan məhrum edilməsi barədə hökm çıxarıb.