Ukraynanın paytaxtı Kiyev şəhərində səhər saatlarından partlayış səsləri eşidilməyə başlanıb. Verilən məlumata görə, ilk partlayış səsləri Peçerski və Qoloseyevski rayonlarında eşidilib.

“Operativ məlumata görə Darniçski rayonu üzərində uçuş həyata keçirən pilotsuz uçuş aparatı Ukrayna ordusu tərəfindən vurulub. Kiyevə ballistik və qanadlı raketlərlə zərbələr endirilir”, - deyə daxili işlər nazirinin müşaviri Anton Qeraşenko bildirib.

İlkin məlumata görə, vurulan PUA yaşayış evinə düşüb. Şəhərin hava hücumundan müdafiə sistemi atılan raketlərin bəzilərini zərərsizləşdirib.

Kiyev meri Vitali Kliçko özünün “Facebook” səhifəsində məlumat verib ki, Rusiya Hərbi Hava Qüvvələrinin hücumu nəticəsində Kiyev şəhərində yerləşən yaşayış binasına raket qalıqları düşüb.

O qeyd edib ki, ilkin məlumata görə üç nəfər xəsarət alıb, onlardan birinin vəziyyəti ağırdır: “Təcili yardım maşınları insanları xəstəxanaya aparır. Hadisə yerində xilasetmə qrupları çalışır. Bina yanır, onun uçmaq təhlükəsi var”.

Kiyevdə təyyarə yaşayış evlərinə çırpılıb. Sosial şəbəkələrdə bununla bağlı kadrlar yayılıb.

Təyyarənin hansı ölkəyə aid olduğu dəqiqləşdirilməyib. Qurbanlar və zərərçəkənlər barədə hələlik məlumat yoxdur.

Həmin görüntüləri təqdim edirik:

Mənbə: Unian