General Çovdarovun ÖLÜM aclığı davam edir
Zorla yedizdirilməyəcəksə, öləcək...; Məmməd Zeynalov: “Xüsusi alət var, 2 nəfər aclıq edən dustağın əlini tutur, 3-cü şəxs isə...” 
Ləğv edilmiş Milli Təhlükəsizlik Nazirliyinin (MTN) Energetika və Nəqliyyat Sahələrində Təhlükəsizlik Baş İdarəsinin sabiq rəisi, general Akif Çovdarov aclığı davam etdirir. Artıq onun keçirdiyi aclıq aksiyasını tərəddüdsüz ölüm aclığı adlandırmaq olar.
Ədliyyə Nazirliyi Tibb Baş İdarəsi rəsmilərinin generalın səhhətinin normal olması ilə bağlı açıqlamalarına rəğmən, onun vəkili Sadiq Rəsulov müvəkkilinin avqustun 19-dan başlatdığı aclıq aksiyası səbəbindən ölə biləcəyini istisna etməyib.
A.Çovdarov ona cinayət işinin materialları ilə tanış olmağa şərait yaradılmasını tələb edir, istintaqın hərəkətlərinin qanunsuz olmasına etirazını aclıq keçirməklə bildirir.
Bəs, odioz general həbsdə başlatdığı aclıq səbəbindən dünyasını dəyişərsə, buna görə kim cavabdeh olacaq?
Vəkili bu suala konkret cavab vermir, deyir ki, bu, ölüm baş verəndən sonra istintaqın müəyyən etməli olduğu məsələdir.
Penitensiar Xidmətin sabiq rəisi Məmməd Zeynalov durumu “Yeni Müsavat”a şərh edərkən bildirdi ki, dustaqların saxlanılmasına, sanitar gigiyenik, qidalanma, həyat və sağlamlıqlarına ümumilikdə dövlətin cavabdeh olduğunu, dövləti müəssisədə təmsil edən şəxslərin sırasında ilk olaraq saxlandıqları müəssisə, bu halda təcridxana rəisinin məsuliyyət daşıdığını açıqlayıb: “Birbaşa cavabdeh şəxs müəssisə rəhbərliyidir. Əgər dustaq deyirsə ki, həyatıma təhlükə var, məni öldürə bilərlər, bununla bağlı bəyanat verirsə, dərhal təhlükəsizlik tədbirləri həyata keçirilməlidir. Akif Çovdarovun durumu fərqlidir, o, aclıq keçirir. Onun tələbi haqlıdır. Əgər istintaq materialları ilə tanış olmaq istəyirsə, ona bu şərait yaradılmalıdır. Aclıq təcridxanada ciddi bir haldır və əgər dustağın durumu ağırlaşırsa, onu tibb-sanitar hissəyə yerləşdirə bilərlər. Akif Çovdarovu əvvəldən digər xəstəliyi ilə bağlı ora köçürüblər. Buna görə də onun köçürülməsinə lüzum qalmayıb”.
A.Çovdarovun vəkili deyir ki, müvəkkilinin aclıq keçirməsi ilə bağlı müvafiq müraciətləri olub, amma Ədliyyə Nazirliyi Tibb Baş İdarəsi rəsmilərinin dediklərindən belə anlaşılır ki, generalın aclıq aksiyası qeydə alınmayıb. Bu halda rəsmi olaraq A.Çovdarovun aclıq keçirdiyi hesab edilmir və müvafiq olaraq onun durumu keçirdiyi faktiki aclıq aksiyası üzündən kəskinləşərsə, ona Cəzaların İcrası Məcəlləsinə uyğun olaraq məcburi qidalanma proseduru tətbiq edilməyəcək.
Yəni bu gedişlə A.Çovdarovun aclıqdan ölməsi labüddür. Əgər onu zorla yedizdirilməyəcəksə, öləcək...
M.Zeynalov deyir ki, Akif Çovdarovun sağlıq durumuna Bakı İstintaq Təcridxanasının baş həkimi cavabdehlik daşıyır: “Aclığı qeydiyyata almaya bilməzlər. Almasalar belə, onun vəziyyəti bu və ya digər xəstəlik üzündən ağırlaşarsa, cavabdeh oradakı həkimlərdir. Məcburi qidalanma proseduru var, ondan istifadə etməlidirlər. Adətən bu proseduru "KQB"də tətbiq edirlər. Akif Çovdarov belə şeyləri yaxşı bilər. Xüsusi alət var, iki nəfər aclıq edən dustağın əlini tutur və 3-cü şəxs xüsusi aləti dustağın ağzına yerləşdirməklə yeməyi boğazına tökür. Çox vaxt dövlətə xəyanət etmiş şəxslər ölüm aclığına başlayırlar. Onların boğazına yeməyi də belə tökürlər. İnanmıram ki, Akif Çovdarov ona belə bir prosedurun tətbiq edilməsinə imkan verər. Çox vaxt dustaqlar belə prosedurun tətbiq ediləcəyini biləndən sonra özləri yeməyə başlayırlar".
Sabiq rəis deyir ki, bundan başqa aclıq keçirən dustaqların xüsusi iynələr vasitəsi ilə sağlamlıq durumlarına ziyan vurmalarının qarşısı alınır: “Aclıq edən dustağın əl-qolunu tutub ona bədəni gücləndirən iynələr vururlar və yemək yeməsini tələb edirlər. Yəni ciddi bir problem deyil, Akif Çovdarova məcburi yedizdirilmə proseduru tətbiq ediləcək. Onun həyatına cavabdeh həkimlərdir”.
M.Zeynalov “aclıq səbəbindən dustağın öləcəyi təqdirdə cavabdeh şəxs kim olacaq” sualına belə cavab verdi: “Adətən, dövləti cinayətlər etmiş şəxslər özlərini öldürürlər. Bu halda cavabdeh heç kim hesab edilmir. Və ya şəxs özünü asır. Bu halda da kimsə məsuliyyət daşımır. Aclıq məsələsində cavabdeh həkimlərdir. Türmə rəisi kiməsə məcburi yemək yedizdirən deyil ki...”
Qeyd edək ki, bir müddət əvvəl Akif Çovdarov və digərlərinin cinayət işi üzrə ibtidai istintaq yekunlaşıb. Hazırda təqsirləndirilən şəxslər və vəkilləri cinayət işinin materialları ilə tanış olurlar. Tanışolma mərhələsi başa çatandan sonra iş baxılmaq üçün məhkəməyə göndəriləcək. Akif Çovdarov Cinayət Məcəlləsinin 308.2 (Vəzifə səlahiyyətlərindən sui-istifadə), 308.1-ci (Məcəllənin bu maddəsi ilə nəzərdə tutulmuş əməllər ağır nəticələrə səbəb olduqda və ya seçkinin (referendumun) nəticələrinə təsir məqsədilə törədildikdə), 311.3.1 (Rüşvət alma (passiv rüşvətxorluq), qabaqcadan əlbir olan bir qrup şəxs və ya mütəşəkkil dəstə tərəfindən), 311.3.2 (Rüşvət alma (passiv rüşvətxorluq) təkrar törədildikdə), 311.3.3 (Rüşvət alma (passiv rüşvətxorluq) külli miqdarda törədildikdə), 311.3.4 (Rüşvət alma (passiv rüşvətxorluq) hədə-qorxu tətbiq olunmaqla törədildikdə), 145.3-cü (Qanunsuz azadlıqdan məhrum etmə, iki və ya daha çox şəxsə qarşı törədildikdə; təqsirkar şəxs üçün aşkar surətdə hamilə vəziyyətində olan qadına qarşı törədildikdə; yetkinlik yaşına çatmayan şəxs barəsində törədildikdə; bir qrup şəxs, qabaqcadan əlbir olan bir qrup şəxs, mütəşəkkil dəstə və ya cinayətkar birlik (cinayətkar təşkilat) tərəfindən törədildikdə; zərərçəkmiş şəxsin həyatı və ya sağlamlığı üçün təhlükəli olan zor tətbiq etməklə törədildikdə; silahdan, yaxud silah kimi istifadə edilən əşyalardan istifadə etməklə törədildikdə, bu əməllər ehtiyatsızlıqdan zərərçəkmiş şəxsin ölümünə və ya digər ağır nəticələrə səbəb olduqda) maddələri ilə ittiham olunur.
Fikirlər
-
Reklam
-
Əsas xəbərlər
