YENİ GENERALIMIZLA BAĞLI ŞOK MƏLUMATLAR! – 36 yaşlı Abbas Xəlilov kimdir və necə general oldu?
Xəbər verdiyimiz kimi, Prezident İlham Əliyev Azərbaycan Respublikasının Dövlət Sərhəd Xidmətinin hərbi qulluqçularına ali hərbi rütbələrin verilməsi haqqında Sərəncam imzalayıb.
Sərəncama əsasən, Dövlət Sərhəd Xidmətinin iki hərbi qulluqçusuna – general-mayor Azad Qaçay oğlu Ələkbərova və general-mayor Fərhad Sabir oğlu Tağı-zadəyə “general-leytenant” ali hərbi rütbəsi verilib. Polkovnik Abbas Sultan oğlu Xəlilova isə “general-mayor” rütbəsi verilib. Beləliklə, Azərbaycan generallarının siyahısına daha bir ad əlavə olunub.
Bəs yeni generalımız kimdir və hansı üstün xidmətlərinə görə Dövlət Sərhəd Xidmətinin rəhbərliyi tərəfindən general-mayor rütbəsinə təqdimatı verilib?
AzPolitika.info yeni generalı yaxından tanımaq istəyərkən, maraqlı məlumatlar əldə edib.
Məlum olub ki, əslən Naxçıvan MR-in Şərur rayonundan olan Abbas Xəlilovun, cəmi 36 yaşı var! Hazırda Dövlət Sərhəd Xidmətinin Kəşfiyyat İdarəsinin rəisi vəzifəsində çalışır.
1979-cu il təvəllüdlü bu gəncin bir sıra tanınmış və vəzifəli şəxslərlə qohumluğu var. Belə ki, A.Xəlilov Azərbaycanın keçmiş ədliyyə naziri Südabə Həsənovanın bacısı oğlu, Azərbaycan Respublikası Prezidentinin Administrasiyasının Sənədlərlə və vətəndaşların müraciətləri ilə iş şöbəsinin müdiri Süleyman İsmayılovun isə kürəkənidir.
Görünür elə məhz bu “xidmətlərinin” sayəsində Abbas Xəlilov belə gənc yaşda, Dövlət Sərhəd Xidmətinin rəisi Elçin Quliyev tərəfindən general rütbəsinə təqdim olunub.
Abbas Xəlilovu uşaqlıq illərindən tanıyan mənbələr, onu xüsusi istedadı və qabiliyyəti ilə seçilməyən, ərköyün uşaq kimi xatırladıqlarını bildirirlər. (AzPolitika.info)
