Bu gün V çağırış Milli Məclisə seçkilər keçirildi.“ELS” Müstəqil Araşdırmalar Mərkəzi parlament seçkilərində keçirdiyi “exit-poll”un ilkin nəticələrini açıqlayıb.

Nəticələrə görə, 35 saylı Xətai III Seçki Dairəsindən Azərbaycan Sosial Demokrat Partiyasının sədri Araz Əlizadə rəqibi, Ümid Partiyasının rəhbəri İqbal Ağazadəni üstələyərək 44,4 % səslə ona qalib gəlib.

Digər maraqlı mənzərə 106 saylı Tovuz-Qazax-Ağstafa Seçki Dairəsində yaranıb. Belə ki, bu dairədə exit-poll”un nəticəsinə görə, Ülviyyə Ağayeva 58,1% səs toplayıb. Dairənin hazırkı deputatı, Ədalət Partiyasının sədri İlyas İsmayılov isə ondan xeyli geri qalıb.

Məsələ ilə bağlı İqbal Ağazadə və İlyas İsmayılov Modern.az saytına açıqlama verib.

İqbal Ağazadə bildirib ki, əllərində onun qalib olmasına dair protokollar var. “Əlimizdə protokollar var. Araz Əlizadənin məntəqələrdə cəmi 5 səsi var. Mən qalib gəlmişəm. Rəsmi nəticələr mənim xeyrimədir”.

Partiya sədri Ölkə.az-a açıqlamasında isə deyib ki, 15 məntəqədən əldə etdikləri protokollara əsasən Əlizadəni xeyli üstələyib:

“Əlimizdə on beş məntəqənin protokolu var. On beş məntəqənin protokoluna görə 4400 səs mən qazanmışam, 160 səs Araz Əlizadə. Şikayətimiz olacaq. Çünki bu fantastik bir şeydir”.

İlyas İsmayılov isə deyib ki, hakimiyyətin göstərişi ilə heç kimin tanımadığı bir şəxs deputat seçilib.

“Məni bu zonada hamı tanıyır, mənə hörmət qoyur. Namizəd olduğum dairədə kifayət qədər böyük nüfuzum var. Seçki kampaniyamda seçicilər məni o qədər gözəl qarşılayırdılar ki! Amma Ülviyyə Ağayeva heç görüş də keçirə bilmirdi. Çünki o, rusdilli idi Görüşünə çox az adam gəlirdi”.

O, bundan sonra daha deputat olmaq istəmədiyini bildirib: “Seçkilər saxtalaşdırıldı. Mən daha deputat olmaq istəmirəm”.