Bir neçə gün bundan əvvəl mətbuatda Dövlət Yol Polisi avtomobillərinə xüsusi cihaz quraşdırıldığı barədə məlumat verilib. Qeyd edilib ki, həmin cihazlarla cəriməsi olan maşınlar bir andaca müyyənləşdirilir, həmin nəqliyyat vasitələrinin sürücüləri cərimələnir.
Bakı Şəhər Dövlət Yol Polisi İdarəsinin bölmə rəisi, polkovnik Vaqif Əsədov Modern.az-a açıqlamasında jurnalistləri qınayıb.  O bildirib ki, həmin cihazlar hələ 2014-cü ildən quraşdırılıb: 

“Jurnalist dostlarımızın hər zamanki kimi sensasiya yaratmaq və sanki yeni bir informasiya vermək xətrinə soruşmadan, araşdırmadan yazdığı informasiyadır. Bu sistem 2014-cü ildən tətbiq edilib. Deyilən bu cihaz “İ patrul” sistemidir. Dünyanın qabaqcıl ölkələrindəki kimi, ölkəmizdə də tətbiq edilib. Bu sistemin özəllikləri çoxdur, işin səmərəli təşkilində sistemin müstəsna xidmətləri var. Sistem sürücü-polis münasibətlərində gərginliyi aradan qaldırır, törədilən xətaları avtomatik qeydə alır, mərkəzi məlumat xidməti bazasında olan məlumatları özündə cəmləşdirir. Bütövlükdə bu sistem inspektorların da işini yüngülləşdirir. 
Sistem 500 metr radiusda avtomobillərin dövlət nömrə nişanını görür, oxuyur, dərhal yaddaşda saxlayır və iformasiyanı bort kompüterə ötürür. “İ patrul” 6 kameradan ibarətdir: sağ, sol, arxa, qabaq və çarpaz. Bu sistemə yeni əlavələr olunub, artıq icbari sığortası olmayan, texniki baxışdan keçməyən, təhlükəsiz kəməri taxmayan, əks istiqamətli yola çıxan və digər qaydaları pozanları aşkarlayır. Bakı şəhərindəki bütün yol patrul avtomobillərində “İ patrul” quraşdırılıb".

AzerTaym.az