2015-ci ildə dünyada hərbi xərclər 1% artaraq 1,7 trilyon dollara çatıb. Novator.az xəbər verir ki, Stokholm Sülh Problemləri Beynəlxalq Tədqiqatlar İnstitutunun aprelin 5-də yaydığı hesabatda belə deyilir.
Hesabatda 2011-ci ildən bəri dünyada hərbi xərclərin ilk dəfə artdığı qeyd olunur.
Məruzədə dünya üzrə hərbi xərclərin əsasən Asiya və Okeaniya, Şərqi və Mərkəzi Avropa, həmçinin Yaxın Şərq ölkələrinin hesabına artdığı vurğulanır.
2015-ci ilin nəticələrinə görə, ABŞ hərbi xərclərini 2,4% (596 milyard dollara qədər) azaltsa da, siyahıya liderlik edir. Onun hərbi xərcləri dünyanın ümumi hərbi xərclərinin 36%-idir.
Hərbi xərclərin həcminə görə üçlükdə sonrakı yerlərdə Çin (215 milyard dollar) və Səudiyyə Ərəbistanı (87,2 milyard dollar) dayanır.
Siyahıda 4-cü yeri Rusiya tutur. 2015-ci ildə Rusiyanın hərbi xərcləri 7,5 faiz artaraq 66,4 milyard dollara çatıb.
Hesabatda qeyd olunur ki, Qərbi Avropa ölkələri 2015-ci ildə hərbi xərclərini 1,3% azaldıb. Bu, regionun 2010-c ildən bəri ən aşağı həcmli illik ixtisarıdır.
