Suriya ordusunun Afrinə girəcəyi barədə dünən yayılan xəbər gündəmi bir anda dəyişdi. Afrində Azad Suriya Ordusu ilə birlikdə “Zeytun budağı” əməliyyatı həyata keçirən Türkiyənin bu xəbərə reaksiyası olduqca sərt oldu.

Xarici İşlər Nazirliyinin başçısı Mövlud Çavuşoğlu bildirdi ki, Bəşər Əsəd rejimi YPG-ni qorumaq üçün Afrinə girərsə, Türkiyəni kimsə dayandıra bilməz.

“Rejim qüvvələri YPG-ni təmizləmək üçün girərsə, bir problem yoxdur. Əgər YPG-ni qorumaq üçün girərsə, o halda türk əsgərini kimsə dayandıra bilməz. Bu, Afrin üçün də, Münbiç üçün də, Fəratın şərqi üçün də etibarlıdır”, - nazir bildirib.

Ardınca Türkiyə baş nazirinin müavini Bəkir Bozdağ isə Ankarada keçirilən mətbuat konfransında rejim qüvvələrinin Afrinə daxil olacağı barədə xəbərlərin əsassız olduğunu söylədi. Və xəbərdarlıq etdi ki, Suriya PYD/YPG terrorçularını qorumaq üçün Afrinə qoşun yeritsə, bu, fəlakətə səbəb olacaq, həmçinin Suriyanın parçalanmasına gətirib çıxaracaq.

Axşam saatlarında isə mövzu ali səviyyədə müzakirə edildi. Türkiyə prezidenti Rəcəb Tayyib Ərdoğanla rusiyalı həmkarı Vladimir Putin arasında dünən baş tutan telefon tanışıqlarının Ankara Moskva üzərindən Dəməşqə növbəti dəfə xəbərdarlıq etdi.

Türkiyə KİV-i xəbər verir ki, Rusiya lideri Ərdoğana Afrin mövzusunda təminat verib. Ərdoğanın Suriya qüvvələrinin Afrinə daxil olmasının ağır nəticələrinin olacağını bildirməsindən sonra, Putin “belə bir şey olmayacaq” şəklində cavab verib.

Bu gün isə Mövlud Çavuşoğlu Suriya rəhbərliyinə aid qüvvələrin Afrinə daxil olmadığını və rejimin Afrinlə bağlı dilemma qarşısında olduğunu söyləyib.

Amma sonradan “Suriya ordusu Afrinə girəcək” yalanının arxasında əslində, Türkiyəyə qarşı çirkin bir planın olduğu ortaya çıxdı.

AzerTaym.az xəbər verir ki, “Haber7” saytının yazdığına görə, Dəməşq “Afrini PKK/PYD-dən təhvil alma” yalanı ilə terror təşkilatına dəstək üçün şəhərə əlavə qüvvələr göndərib.

Xəbərə görə, “Zeytun budağı” əməliyyatı ilə strateji nöqtələrlə birlikdə Afrinin mərkəzini itirəcəyini anlayan terror təşkilatı PYD/PKK və təşkilatı “ABŞ başda olmaqla, xarici ölkələrin maraqlarına xidmət edən vətən xaini” elan edən Bəşər Əsəd rejimi Türkiyəyə qarşı bir daha birləşib. Ata Əsəd dövründə də Suriyanın PKK üçün sığınacağa çevrildiyini deyən ekspertlər Münbiçdə də rejimin PYD/PKK üçün qalxan olduğunu xatırladıblar. Lakin onların sözlərinə görə, Türkiyə Afrində bu oyuna getməyəcək.

Ehtiyatda olan polkovnik Nejat Özden bildirib ki, Türkiyə ordusu və Azad Suriya Ordusu Afrində 14-ü strateji olmaqla, 80-nə yaxın nöqtəni tutub. Sonuncu strateji nöqtə kimi Cinderesin qaldığını deyən polkovnikin sözlərinə görə, indi oradan da çəkilirlər və Cinderesin itirilməsi hərbi baxımdan Afrinin itirilməsi deməkdir. O bildirib ki, Dəməşqi narahat edən məqam da məhz budur.

“PYD ilə Əsəd rejimi arasındakı “döyüş” onsuz da bir teatr idi. Münbiçdə oynanılan oyun artıq Afrində oynanılır. Rejim qüvvələri PYD və Azad Suriya Ordusu arasında yerləşdirilərək terrorçuların mühafizəsi təmin edilir. “Afrində rejim qüvvələri var” deyərək əməliyyatın dayandırılmasından söhbət gedə bilməz. Afrin 35 ildir ki, PKK-nın Türkiyəyə hücumlarına qarşı keçid nöqtəsidir. Suriyanın şimalında PKK dəhlizinin mərkəzi Afrindir”, - o bildirib.

Professor Məsud Hakkı Casın qeyd edir ki, Bəşər Əsəd rejimi Türkiyəni tələyə salmağa çalışarsa, bu onun sonu olar. O, “Zeytun budağı” əməliyyatının Afrin təmizlənənə kimi davam edəcəyini vurğulayıb.

Ehtiyatda olan polkovnik, təhlükəsizlik mütəxəssisi İbrahim Keleş 2012-ci ildə rejim qüvvələrinin bir güllə atmadan belə Afrinin terror təşkilatına təslim edildiyini xatırladıb.

“Azad Suriya Ordusu kimi real Suriya müxalifətinin Afrində söz sahibi olması həm PYD, həm də Əsədin planlarını məhv etdi. PYD orada mühafizəçi idi. Əməliyyatımız uğurlu olduğu üçün rejim yenidən səhnəyə çıxdı. Münbiçdə də eyni taktikanı tətbiq etmişdilər. Türkiyə Əl-Babdan Münbiçə yönəldiyində bir ovuc rejim əsgəri araya girdi və PYD/PKK üçün qalxan oldular. Afrində də eyni taktika. Türkiyə bu oyuna gəlməz”, - təhlükəsizlik mütəxəssisi söyləyib.