Azərbaycanda dövlət qulluğuna qəbul zamanı müsabiqə ilə tutulacaq yüksək vəzifələrin siyahısı məlum olub.

Fins.az-ın əldə etdiyi məlumata görə, Əmək və Əhalinin Sosial Müdafiəsi Nazirliyi yanında Dövlət Sosial Müdafiə Fondu, Sahibkarlığa Kömək Milli Fondu və Nəqliyyat, Rabitə və Yüksək Texnologiyalar Nazirliyinin tabeliyində İnformasiya Texnologiyalarının İnkişafı Dövlət Fondunun icraçı direktoru və onların müavini vəzifələrinə qəbul müsabiqə qaydasında aparılacaq.

Bundan başqa, Naxçıvan Ali Məclisi, Azərbaycan və Naxçıvanın İnsan hüquqları üzrə Müvəkkilləri (Ombudsman), Naxçıvan Ali Məhkəməsi, Naxçıvan Nazirlər Kabineti, Apellyasiya məhkəmələri, Hesablama Palatası, Məhkəmə-Hüquq Şurası, Milli Televiziya və Radio Şurası (MTRŞ), Mərkəzi Seçki Komissiyası (MSK), mərkəzi icra hakimiyyəti orqanlarının və onlara bərabər tutulan orqanlar, Nazirlər Kabineti yanında olan icra hakimiyyəti orqanlarının və Bakı Şəhər İcra Hakimiyyətinin Aparat rəhbəri vəzifələrinə qəbul müsabiqə yolu ilə baş tutacaq.

Eyni zamanda, Naxçıvan Muxtar Respublikası Ali Məclisinin Aparatında, Hesablama Palatasının Aparatında, Məhkəmə-Hüquq Şurasının Aparatında, Ombudsman Aparatında, Apellyasiya məhkəmələrinin Aparatında, MSK-nın Aparatında, mərkəzi icra hakimiyyəti orqanlarının və onlara bərabər tutulan orqanların Aparatında, Nazirlər Kabineti yanında olan icra hakimiyyəti orqanlarının Aparatında, MTRŞ-nın Aparatında, Bakı Şəhər İcra Hakimiyyəti başçısının Aparatında, mərkəzi icra hakimiyyəti orqanları yanında yaradılan dövlət agentlikləri və dövlət xidmətlərində, Sahibkarlığa Kömək Milli Fondu Aparatında, Nəqliyyat, Rabitə və Yüksək Texnologiyalar Nazirliyinin tabeliyində İnformasiya Texnologiyalarının İnkişafı Dövlət Fondu Aparatında, Əmək və Əhalinin Sosial Müdafiəsi Nazirliyi yanında Dövlət Sosial Müdafiə Fondu Aparatında və ağır cinayətlər məhkəmələrinin, inzibati-iqtisadi məhkəmələrin, hərbi məhkəmələrin aparatlarında şöbə müdiri vəzifələrinə imtahanla qəbul həyata keçiriləcək.

Habelə Hesablama Palatası sədrinin köməkçisi, Ombudsmanın köməkçiləri, Bakı Şəhər İcra Hakimiyyəti başçısının köməkçisi, mərkəzi icra hakimiyyəti orqanlarının və onlara bərabər tutulan orqanların rəhbərlərinin müşavirləri, köməkçiləri, Nazirlər Kabinetinin yanında olan icra hakimiyyəti orqanlarının rəhbərlərinin müşavirləri, köməkçiləri, MTRŞ sədrinin köməkçisi vəzifələrinə yiyələnmək üçün müsabiqədə iştirak mütləq olacaq.
Qeyd edək ki, Nazirlər Kabinetinin təsdiqlədiyi yeni qaydalarla dövlət qulluğuna qəbulun müsabiqə əsasında aparıldığı təsnifatların sayı artırılıb.