Qarabağın işğaldan azad olunmuş Xankəndi və digər ərazilərində yaşayan ermənilər evlərini yenidən satışa çıxarmağa başlayıblar. Erməni əmlak satışı saytlarında sözügedən ərazilərdəki daşınmaz əmlaklarla bağlı yerləşdirilən elanların sayı hər keçən gün daha da artır.

Araşdırmalarımız göstərir ki, Xankəndi və ətraf ərazilərdəki evlər dəyərindən daha aşağı qiymətə satışa çıxarılıb. Sayı getdikcə çoxalan satış elanlarına nəzər yetirəndə görürük ki, əksəriyyəti “təcili”, “razılaşma mümkündür” başlığı ilə qeyd olunub.

Ermənilərin Qarabağdakı evlərini kütləvi şəkildə satışa çıxarmalarını 44 günlük Vətən müharibəsində Azərbaycanın qələbəsindən sonra da müşahidə etmişdik. Belə ki, savaşda məğlub olan ermənilər sözügedən ərazilərin onlara aid olmadığını dərk edərək kütləvi formada daşınmaz əmlak agentliklərinə elan yerləşdirirdilər. 2020-ci ilin noyabr-dekabr aylarını əhatə edən elanlar görünür ki, heç bir işə yaramayıb. Hazırda Ermənistanın aparıcı satış saytlarında ötən ilin son iki ayında yerləşdirilən elanların yenilənməsi prosesi müşahidə olunur. Yəqin ki, ermənilər ilk vaxtlar evlərini satışa çıxarsalar da, bunun heç bir effekt vermədiyini və kənardan kimsənin gəlib o ərazilərdə ev almayacağını dərk ediblər. İndi isə dəyərinə-dəyməzinə verib müəyyən miqdar da olsa Qarabağdakı əmlaklarını pula çevirmək niyyətindədirlər. Bununla yanaşı, ermənilər Xankəndidə mənzillərlə yanaşı, ticarət obyektlərini, tikintisinə yeni başlanan çoxmərtbəli bina layihələrini, torpaq sahələrini də satışa çıxarıblar. Təkcə bir satış saytında son bir həftə ərzində 40-a yaxın mənzil elanı yerləşdirilib.

Elanın verilmə tarixi 20.12.2020. Yenilənib: 19.09.2021, List.am satış saytı

Sözügedən elanlarda başqa bir detal da diqqət çəkir. Belə ki, hazırda satışa çıxarılan evlərin böyük əksəriyyətinin xarici nömrələrlə elan saytlarında yerləşdirildiyini görürük. Bəziləri Avropa ölkələrinə məxsus əlaqə vasitələri olsa da Rusiyaya məxsus nömrələr üstünlük təşkil edir. Bu isə daha bir erməni yalanını ifşa edir: Qarabağda yaşayan ermənilərin saylarının süni şəkildə şişirdilməsi təsdiqini tapır. Yəni ermənilərin təqdim etdiyindən fərqli olaraq reallıqda rəqəmlər tam fərqlidir – Qarabağdakı ermənilərin sayı deyilən rəqəmlərdən çox aşağıdır.

Publika.az-a danışan “Uniprice” Ekspertiza və Qiymətləndirmə Mərkəzinin direktoru, əmlak məsələləri üzrə ekspert Ramil Qasımzadə deyir ki, ermənilər üçün evin baha və ya ucuz qiymətə satılmasının heç bir fərqi yoxdur. Əsas olan daşınmaz əmlaklarını müəyyən miqdar pula satmaqdır.

Ekspert bildirib ki, ermənilərin xüsusi olaraq qeyd etdikləri “real alıcıya endirim”in real olub-olmaması ilə bağlı elanı yerləşdirən şəxslərlə əlaqə saxlanılıb və onlar əmlaklarını saytda göstərdikləri rəqəmdən daha aşağı qiymətə təklif ediblər:

“Biz sosial şəbəkə üzərindən onlarla qeyri-rəsmi danışıqlar aparıb qiymətlərlə maraqlanmışıq. Almaq niyyətimizin olduğunu da bildirmişik. Onlar isə neçəyə olsa satacaqlarını deyirlər, yəni əsas olan əmlakın satılmasıdır. Əksəriyyəti Moskvada yaşadaqlarını bildirir. Əməkdaşımız qiymətin baha olduğunu desə də, “danışarıq, aşağı qiymətə də verərik” deyə cavab verilib. Onlar üçün əsas qiymət deyil, dəyər-dəyməzinə satıb getməkdir. Artıq başa düşürlər ki, Azərbaycan vətəndaşları ilə birlikdə Xankəndidə yaşamalıdırlar. Düzdür, bu istəkdə olanlar da var. Çünki kasıb, aclıq və səfalət içərisində olan Ermənistanda yaşamaqdansa Azərbaycanda yaşamalarını bir çoxları üstün tutacaq. Amma elələri də var ki, əmlaklarını satdıqdan sonra Ermənistana deyil, xaricə üz tutmaq istəyir. Əllərində müəyyən miqdarda əllərində valyutanın olması kifayət edir ki, onlar ölkəni tərk etsinlər. Hətta elanların bəzilərində onlar satışa çıxardıqları əmlakın qiymətini erməni pul vahidi ilə deyil, dollarla qeyd ediblər. Xarici nömrələrdən də istifadə edirlər. Yəni, ola bilər ki, bəzi insanlar ölkədən gediblər və əmlakları buradadır, sadəcə satıb xeyir əldə etmək niyyətindədirlər. Onlar indidən xırda miqdar da olsa müəyyən qədər vəsait əldə etmək üçün əmlaklarını satışa çıxarırlar”.

R.Qasımzadə ermənilərin Xankəndidə satışa çıxardıqları evlərin orta qiymətini qeyd edib: “Bir otaqlı evlər 10 min dollardan təklif edilir, 20 min dollara da var. Yəni qiymət evin şəraitinə, yerləşmə yerinə görə dəyişir. İki otaqlı mənzillər 15 min dollardan 25 min dollara, 3 otaqlı evlər 20 min dollardan 40 min dollar civarı, 4 otaqlılar isə 25 min dollardan yuxarı təklif edilir. Ən çox təklif olunanlar isə təkrar mənzil bazarına aid olan mənzillərdir”.

Ekspertin sözlərinə görə, ermənilərin Qarabağ ərazisində torpaq satışını həyata keçirməsinin hüquqi əsası yoxdur. Onlar yalnız torpaq üzərində olan əmlaka sahibdirlər. Ərazi isə Azərbaycana aiddir: “Onlar evlərini qanunsuz olaraq, əvvəl qondarma qurumlarının verdiyi saxta qanunvericilik sənədlərinə uyğun olaraq satışa çıxarırlar. Bunun isə heç bir hüquqi əsası yoxdur. Onların sadəcə orada yaşamaq üçün istifadə hüquqları var, yəni istifadə hüquqlarını satışa çıxarırlar. Ümid edirik ki, zamanı gələndə bu qanunsuzluğa son qoyulacaq”.