Gəncə Dövlət Dram Teatrında “Hamlet” tamaşasının ictimai baxışı baş tutmayıb. 

"AzerTaym.az" “Ölkə.Az”a istinadən xəbər verir ki, bu barədə sosial şəbəkədə teatrın aktyoru Yusif Cəfərov yazıb. Maraqlıdır ki, hər zaman direktor Əli Qasımovu müdafiə mövqeyi ilə seçilən Cəfərov bu dəfə baş rejissor İradə Gözəlovanın tənqidi fikirlərini dəstəkləyib: 

“Mən ömrümdə birinci dəfədir ki, belə işlə qarşılaşıram. Dekorsuz, kostyumsuz tamaşaçılara tamaşa təqdim etmək… Amma direktor istədiyini edir, mənim sözümə məhəl qoymur. Yaxşı ki, ictimai baxış baş tutmadı. Vallah yorulmuşam”.

Y.Cəfərov isə öz növbəsində bunları yazıb:

“Tamaşaçını ələ salmaq olmaz. Sonra da deyirlər ki, tamaşaçı teatra gəlmir. Hər şey öz yerini alacaq, İradə xanım. Daha zəmanə o zəmanə deyil”.

Bu arada “Ölkə.Az” Gəncə Dövlət Dram Teatrıyla bağlı daha bir maraqlı məlumat əldə edib. Bildirilir ki, teatr may ayında Başqırdıstanın paytaxtı Ufa şəhərində keçirilən ənənəvi teatr festivalına dəvət alıb. Festivala “Hellados” tamaşası ilə qatılan Gəncə teatrının direktoru Əli Qasımovla, aktyor Yusif Cəfərov arasında gərginlik yaranıb:

“”Hellados” tamaşası ötən ilin payızında Nodar Dumbadzenin yubileyi ilə əlaqədar Gürcüstanda nümayiş etdirildi. Həmin vaxt tamaşada əsas rolları xalq artisti Pərvanə Qurbanova, Yusif Cəfərov və Sevda Orucova oynayırdılar. Sonradan bu tamaşanın Gəncədə də oynanılması qərara alındı. Ancaq bu üç nəfər Gəncə tamaşaçısı qarşısında oynamaqdan imtina etdilər. Onların yerinə “Hellados”da teatrın nisbətən cavan aktyorları rol aldılar. Tamaşaa may ayında Ufa şəhərinə aparılanda yenidən Pərvanə Qurbanova, Sevda Orucova və Yusif Cəfərov öz rollarını cavan aktyorlardan geri aldılar. Yəni, bu adamlar Gəncə tamaşaçısı üçün oynamağı özlərinə sığışdırmırlar. Qastrol zamanı Yusif Cəfərovla direktor Əli Qasımovun sözləri çəp gəlib. Hətta Cəfərov Əli Qasımova bir təpik də vurub”.

Qeyd edək ki, Ufa şəhərində keçirilən festivalda teatrın gənc aktyoru Murad Meyfalıyev “Ən yaxşı aktyor” nominasiyasının qalibi olub.