NATO-nun Norveçdə təlim mərkəzində Türkiyə dövlətinin qurucusu Mustafa Kamal Atatürkün və hazırki prezident Rəcəb Tayyib Ərdoğanın şəkillərini atış üçün hədəf kimi qoymasına Türkiyədən sərt reaksiya gəlib.

“Qafqazinfo” Türkiyə mediasına istinadən xəbər verir ki, ölkənin ədliyyə naziri Bəkir Bozdağ NATO-nun bu hərəkətini böyük skandal adlandırıb. O, “Bu, boyük biabırçılıq, alçaqlıqdır. Bu alçaq addımı atanları nifrətlə qınayırıq”,- deyib. 

Nazirin sözlərinə görə, bu addım Türkiyə üçün gecə-gündüz çalışan liderləri sevməməkdən irəli gəlir: “Türkiyəyə qarşı düşmənlik edənlər ölkəni sevənləri, dirçəltmək istəyənləri görmək istəmirlər. Onlara qarşı düşmənliklərini gizləmirlər”. 

Bundan başqa, təlim sırasında prezident Ərdoğanı qaralamaq üçün yaradılan saxta hesabdan edilən paylaşımlar ortaya çıxıb. 
“RTERDOĞAN” adıyla açılan saxta hesabda prezident Ərdoğanı NATO düşməni kimi təqdim edən paylaşımlar edilib. 

Türkiyənin hərbi mənbələri isə hadisədə sadəcə 1-2 şəxsin məsuliyyət daşımadığını, NATO-nun ölkə üçün açıq təhdid olduğunu qeyd ediblər:

“Bu, son dəqiqə qalmaqalı və tək bir zabitin işi deyil. Təlimin planlaşdırma müddətində bu bəlli olmalı idi. Xəyali düşmən tablosu boş buraxılmış olsa belə, ən azı 1-2 ay əvvəl kimlərin ora daxil ediləcəyi məlum olmalı idi. Bu ssenaridə istifadə ediləcək hər bir detal təsdiqlənmə prosedurundan keçir. Bu kimlərinsə bilərək etdiyi oyundur”. 

Ərdoğan da dünənki çıxışı zamanı bu olayı sərt tənqid edib. O hədəflər aradan götürülsə belə Norveçdəki NATO təlimlərinə qatılan 41 türk əsgərinin təcili geri çağırılmasını əmr edib: “Belə bir ittifaq, müttəfiqlik olmaz. Oyun başqadır. Zaman-zaman başqa yerlərdə də bu kimi şeylər edildi”.

Qeyd edək ki, baş verənlərdən sonra NATO baş katibi Yens Stoltenberq əvvəlcə yazılı şəkildə, daha sonra Kanadada səfərdə olan Türkiyənin Baş  Qərargah rəisi Hulusi Akarla üz-üzə gələrək üzr istəyib.