Rusiya dövlət orqanları ölkə qanunlarını pozmayan vətəndaşları təqib edə bilməz. Vaşinqton ABŞ-dakı prezident seçkilərində Rusiyanın müdaxiləsi faktını təsdiqləyən rəsmi sənədləri təqdim etməlidir.

APA-nın xəbərinə görə, bunu Rusiya prezidenti Vladimir Putin NBC telekanalına müsahibəsində deyib.

“Əvvəlcə mən onların nə etdiklərini görməliyəm. Bizə məlumatlar verin, materiallar təqdim edin. Sizin hüquq sahəsində diplomlu insanlarınız hökmən olmalıdır. Bununla bərabər, bütün sənədlər mətbuat və ABŞ Konqresindəki fəryadlardan yox, rəsmi kanallardan keçməlidir”, deyə Rusiya prezidenti vurğulayıb.

Fevralın 16-da ABŞ Ədliyyə nazirliyi prezident seçkilərinə müdaxilə etdikləri üçün 13 Rusiya vətəndaşı və bu ölkənin 3 şirkətinə qarşı ittiham irəli sürüb.

Qeyd edək ki, ABŞ Konqresinin hər iki palatasının müvafiq komitələri Rusiyanın ABŞ-dakı son prezident seçkilərinə müdaxiləsi və Trampın komandasının Rusiya ilə əlaqələrinə dair təhqiqat aparır. Ədliyyə Nazirliyi tərəfindən təyin olunan xüsusi prokuror Robert Müller də analoji təhqiqatı davam etdirir.