Ötən gün Moldovanın paytaxtı Kişineuda "Avropa siyasi birliyi" 2-ci Zirvə toplantısı keçirilib.

Toplantıya Avropanın 50-dən artıq ölkəsinin dövlət və hökümət başçıları qatılıb. Zirvə görüşünün keçirilməsində əsas məqsəd Avropa ailəsinin üzləşdiyi problemləri birlikdə müzakirə etmək və müvafiq çıxış yolları axtarmaq idi. 

Məlum olduğu kimi həm Avropa Şurası, ATƏT kimi beynəlxalq təşkilatlar hazırda ciddi böhran yaşayır.

Eləcə də Avropanın cəlb edildiyi bir sıra problemlərdən hazırda hər bir Avropa ölkəsi ciddi ziyan görür. Bu problemlər Ukrayna-Rusiya müharibəsindən başlayıb, iqtisadi geriləmələrə və siyasi böhranlara qədər davam edir. 

Faktiki olaraq Aİ labirintə düşüb. Bu labirintən çıxış yolu tapmaq üçün Aİ digər Avropa dövlətlərinin yardımlarından və imkanlarından yararlanmağa çalışır. Bunun üçünsə Aİ-nin yardımına ehtiyac duyduğu ölkələr var. 

Həmin ölkələrin önündə isə Azərbaycan gəlir. 

Çünki, Azərbaycan Avropanın enerji, dolayısı ilə iqtisadi-siyasi təhlükəsizliyində xüsusi pay sahibidir. Üstəlik, Azərbaycanın unikal tranzit imkanları Qərb üçün cəlbedicidir. 

Məhz buna görə də ötən gün Kişineuda keçirilən görüşlərdə Azərbaycan Prezidenti İlham Əliyev diqqət mərkəzində idi. Cəmi bir gün ərzində Azərbaycan Prezidentinin Avropa İttifaqı Şurasının Prezidenti Şarl Mişellə, Fransa, Almaniya, Ukrayna və Moldava prezidentləri ilə çox məhsuldar və işgüzar görüşləri olub. 

Bundan əlavə, Moldovanın paytaxtında Prezident İlham Əliyev “Avropa siyasi birliyi”nin 2-ci Zirvə toplantısı çərçivəsində işçi lançda, “Avropa siyasi birliyi”nin 2-ci Zirvə toplantısı çərçivəsində enerji təhlükəsizliyi məsələsinə həsr edilmiş dəyirmi masada iştirak edib.

Eyni zamanda, Kişineuda Azərbaycan Prezidenti İlham Əliyev, Ermənistan baş naziri Nikol Paşinyan, Avropa İttifaqı Şurasının Prezidenti Şarl Mişel, Almaniya Kansleri Olaf Şolts və Fransa Prezidenti Emmanuel Makronun iştirakı ilə qeyri-rəsmi görüşləri olub. 

Qısa zaman kəsiyində bu qədər görüşlərin keçirilməsi bir daha onu göstərir ki, Azərbaycan Avropa üçün vacib tərəfdaşdır. Və Azərbaycanın əlindəki iqtisadi rıçaqlardan yararlanmaq üçün Qərb indiyə qədər atmaq istəmədiyi addımları atmağa hazırdır.

Qərbin Azərbaycana ehtiyacı var

Mövzu ilə bağlı Bizim.Media ilə fikirlərini bölüşən beynəlxalq məsələlər üzrə ekspert Əziz Əlibəyli bildirib ki, Azərbaycanın Aİ-lə enerji təhlükəsizliyi sahəsində olan əməkdaşlığın dərinləşməsi üçün çoxlu imkanlar var:

“Lakin, bütün imkanların reallaşması daha çox regional və qlobal proseslərlə bağlıdır. Ona görə də Avropa ABŞ və Çinin qarşısına iqtisadi və siyasi güc kimi çıxmaq üçün Qafqazın, eləcə də Azərbaycanın imkanlarından yararlanmaq istəyir. 

Burda AvroAtlantik baxışlar da var. Yəni Azərbaycan Qərbin əzəli rəqibləri olan Rusiya və İranla yaxın qonşudur. Ona görə də Qərbin Azərbaycandan umacaqları çoxdur. Elə son 20 gündə Avropa liderlərinin 2 dəfə təkrarən Azərbaycan Prezidentinə ünvanlanan təbrik məktubları da bunun sübutudur. 

Üstəlik, Avropanın aparıcı dövlətləri olan Almaniya və Fransanın Azərbaycanla bağlı məsələlərin müzakirəsində iştirak arzusu da az şey ifadə etmir. Burada təbii ki, Fransanın mövqeyi bir qədər başqa cürdür. Amma rəsmi Paris də dolayısı ilə Azərbaycanın qazandığı hansısa uğurda pay sahibi olduğunu can-başla sübut etməyə çalışır”.

Əziz Əlibəyli onu da əlavə edib ki, “Avropa siyasi birliyi”nin 2-ci Zirvə toplantısı Azərbaycan üçün bir çox məqamları ilə uğurlu və yaddaqalan oldu:

“Bunlardan biri Azərbaycanın Qərb üçün əvəzolunmaz partnyor stasusunun bir daha təsdiq edilməsidir. Hətta Zelenski belə macal tapıb Azərbaycan Prezidentinə öz minnətdarlığını bildirdi. İkinci uğurlu məqamsa ondan ibarət oldu ki, Ermənistanla Azərbaycan arasında imzalanacaq sülh sazişinin tezləşdirilməsi prosesinə ilk dəfə olaraq Almaniya qatıldı. Almaniya bu prosesə hələlik qeyri-rəsmi qatılıb. Lakin bu gələcək uğurlara vəsilə ola bilər”.