Rabitə və yüksək texnologiyalar naziri Əli Abbasov Azərbaycan prezidenti İlham Əliyevin himayəsi, Rabitə və Yüksək Texnologiyalar Nazirliyinin (RYTN) dəstəyi və təşkilatçılığı ilə 2-5 dekabr tarixlərində baş tutacaq "Bakutel-2015” 21-ci beynəlxalq sərgi-konfransının təşkili məqsədilə hazırlanmış Tədbirlər Planını təsdiq edib.

 Tədbirlər planı, həmçinin "Digital Single Market” adlı konfrans və nazirlər toplantısının, Qara Dəniz İqtisadi Əməkdaşlıq Təşkilatının elm və texnologiya sahəsində əməkdaşlıq üzrə nazirlər toplantısının, 3-cü Azərbaycan-Belarus İKT Forumunun, İnformasiya cəmiyyətinin inkişafı üzrə yüksəksəviyyəli İşçi Qrupunun iclasının, 2-ci Azərbaycan-İsrail İKT Forumunun, "İKT İnnovasiyalarının Regional İnkişaf Mühitinin Yaradılması” devizi altında 3-cü "Regional İnternet İdarəçilik Forumu Azərbaycan” (RİFAZ 2015) tədbirinin, "Azərbaycan Respublikasında İKT infrastrukturunun və İKT xidmətlərinin davamlılığının və səmərəliliyinin modernləşdirilməsi layihəsi” və UNDESA-nın birgə təşkilatçılığı ilə dövlət qulluqçuları üçün nəzərdə tutulmuş "Təkmilləşmiş dövlət xidmətlərinin çatdırılması üçün e-hökumətin təbliği” adlı seminarın və RYTN və Azərbaycan Milli Elmlər Akademiyasının birgə təşkilatçılığı ilə "Big data: imkanlar, multidisiplinar problemlər və perspektivlər” respublika elmi-praktiki konfransının təşkili məsələlərini də ehtiva edir.

 Tədbirlər Planında Bakı Ekspo Mərkəzində sərginin keçirilməsi ilə əlaqədar 11 000 m2 təchiz olunmuş sahənin, konfrans zallarının və təşkilati işlərin görülməsi üçün nəzərdə tutulan otaqların icarəyə götürülməsi, Bakı Ekspo Mərkəzində və tədbir ərəfəsində təşkil olunacaq digər iclasların keçiriləcəyi məkanlarda lazımi texniki və ofis avadanlıqlarının təşkili, tədbirlərin tərcüməçilərlə təmin olunması, eləcə də tədbirlərin təşkilinə RYTN-in şöbələri və istehsalat birliklərinin nümayəndələrinin cəlb olunması, tədbirlər üçün çap materiallarının hazırlanması nəzərdə tutulub. Tədbirlər Planına görə, tədbir mətbuatda işıqlandırılacaq və tədbirə mətbuat nümayəndələri dəvət ediləcək.