Elman Zeynalovun həyat yoldaşı haqqında Antikorrupsiya Bürosunda araşdırma bşalayıb
Azərbaycanın Latviyadakı səfiri Elman Zeynalovla bağlı bu ölkədə skandal qalxıb. Daha dəqiqi səfirin həyat yoldaşı Nəzirə Zeynalova ilə bağlı Lativiyanın Antikorrupsiya Bürosunda araşdırma başlayıb.
Haqqin.az saytının yaydığı məlumata görə, diplomatın xanımı sürücülük vəsiqəsi almaq üçün qanunsuz yollara baş vurub. O, Azərbaycan ənənəsindən çıxış edərək, sürücülük vəsiqəsini xüsusi kurs və təcrübə keçmədən, müəyyən məbləğ müqabilində dərhal almaq istəyib. Bu məqsədlə yerli yol hərəkəti təhlükəsizliyi direksiyasının müfəttişlərinə 500 avro təklif edib.
Saytın əməkdaşı rüşvət təklifi alan iki müfəttişdən biri – İvas Karlislə telefon əlaqəsi yarada bilib. Müfəttiş Azərbaycanlı xanımın sürücülük vəsiqəsi üçün rüşvət təklif etdiyini təsdiqləyib.
“Biz dərhal Antikorrupsiya Bürosuna zəng etdik və Azərbaycan vətəndaşı olan xanım saxlanıldı. Onu tezliklə sərbəst buraxdılar, lakin onunla bağlı iş büroda araşdırılır. Bu barədə hətta Latviya Xarici İşlər Nazirliyi də məlumatlandırılıb”, – deyə İvas Karlis baş verənləri nəql edib. Lakin müfəttiş onlara rüşvət təklif edən xanımın adını çəkməyib.
Həmin xanımın səfir Zeynalovun həyat yoldaşı olduğunu haqqin.az öz mənbələri ilə dəqiqləşdirib.
Elman Zeynalov xarici siyasət idarəsində 1993-cü ildən çalışır. Əvvəllər Azərbaycanın Ukraynadakı səfirliyində və XİN-in mərkəzi aparatında işləyib. 2005-ci ildə Bolqarıstanda səfir təyin olunub. Sonra isə iş yerini Latviyaya dəyişib.
Azərbaycan XİN-dən hadisəni şərh etmək istəməyiblər.

Azərbaycanın Latviyadakı səfiri Elman Zeynalov səfir olduğu ölkədə həyat yoldaşı Nəzirə Zeynalovaya cinayət işi açılması ilə bağlı yayılan xəbərə aydınlıq gətirib.  E. Zeynalov APA-ya açıqlamasında bildirib ki, həyat yoldaşı N. Zeynalova ötən ilin sonunda sürücülük vəsiqəsi ilə bağlı bütün imtahanları və lazım olan mərhələləri əla göstəricilərlə verib:“Bütün mərhələləri özü keçəndən sonra əməkdaşa 500 yox, 50 avro Yeni İl qabağı hədiyyə olaraq verib. Yəni vəsiqə müqabilində yox, sadəcə sonda, hər şeyi özü yerinə yetirəndən sonra Yeni İl hədiyyəsi kimi təqdim edib. Bu hər yerdə, eləcə də burda adi haldır. Sadəcə o məmur görüb ki, bu səfir xanımıdır, qorxuya düşüb nədirsə götürüb öz idarələrinə bunu rüşvət kimi təqdim edərək məlumat verib. Onlar da buranın Xarici İşlər Nazirliyinə məlumat veriblər. Buranın XİN-i isə mənə bunu təəssüflə bildirdilər ki, “heyif ki, o məmur bunu belə anlayıb” və mənə buna görə narahat olmamağımı bildiridlər. Çünki onlar mənim fəaliyyətimi çox yaxşı bilirlər. Burada hər şey açıq aşkar bilinir”.

Səfir qeyd edib ki, onun xanımı ilə bağlı cinayət işi açılması barədə xəbər həqiqəti əks etdirmir: “Diplomatlarla və onların ailəsi ilə bağlı müvafiq konvensiyaya görə cinayət işi açıla bilməz. İkincisi isə burada bu hala görə cinayət işi açılmır, ən azı onun açılması üçün bu yetərincə sübut sayılmır. Çünki xanımımın sürücülük vəsiqəsi ilə bağlı bütün imtahanları özünün verdiyi rəsmən təsdiqlənmişdi, onlar tərəfindən bu qeydə alınmışdı. Yəni pul, özü də elə az miqdarda hədiyyə şəklində verilən pul vəsiqəni almaq üçün təklif olunmayıb”.

E. Zeynalov qeyd edib ki, o, səfir kimi fəaliyyətində həmişə diqqətli və həssas olub: “Mən indi buranın da qanunlarını bildiyim halda heç belə addıma yol verə bilərəmmi? Ona görə də məlumatları yazarkən mənimlə əlaqə saxlamaq daha yaxşı olardı. Mən vətənimin və dövlətimin keşiyində, onun adı ilə həmişə şərəflə, qürurla xidmət etmişəm”.

Qeyd edək ki, haqqın.az saytı Azərbaycanın Latviyadakı səfiri Elman Zeynalovun xanımı Nəzirə Zeynalovanın sürücülük vəsiqəsi almaq üçün Latviyada məmura 500 avro rüşvət verdiyini, bununla bağlı məmurun müraciəti əsasında cinayət işi açıldığını yazıb.