“O şərəfsizlərin kimliyini yaxşı bilirəm” - İmamverdi İsmayılov
22-11-202421-11-202420-11-2024
“Sosial mediada, bəzi KİV-lərdə oğlum barədə dərc olunan yazılar tamam böhtan xarakterlidir. Bütün bunlar ancaq qərəzdən irəli gəlir”.
Bu sözləri Modern.az saytına açıqlamasında deputat İmamverdi İsmayılov oğlu İlkin İsmayılovun adının Qubadakı “Retro” istirahət mərkəzində qətlə yetirilən Könül Zalova ilə yanaşı hallandırılmasına münasibət bildirərkən deyib.
Deputat qeyd edib ki, ona əli çatmayan bəzi şəxslər mətbuatda oğluna qarşı məqsədli və davamlı şəkildə kampaniya aparırlar: “Hardasa baş verən bir hadisəni əli çata bilmədiyi admla əlaqələndirmək kimi işlərlə məşğul olan mənəviyyatsızlar var. Bunun adı böhtan, yalan, çirkin dolu, heç bir əxlaqa, mənəviyyata sığmayan kampaniyadır. Dəfələrlə belə şərəfsiz, ləyaqətsiz addımlar atıblar. Ancaq hər dəfə də məlum olub ki, bunlar şər,böhtanla məşğuldurlar, yazdırdıqlarının heç biri sübuta yetməyib. Mən bu xəbis, paxıl, gözügötürməzlərin və mənə əli çatmayanların kimliyini yaxşı bilirəm.
Hesab edirəm ki, bundan böyük şərəfsizlik, mənəviyyatsızlıq yoxdur. Ailəni, övladı belə məsələlərə qatmaq insan üçün ən sonuncu yoldur. Buyurusunlar yazdırdıqlarını sübut etsinlər. Edə də bilməyəcəklər, çünki şər, böhtandır.
Onları belə alçaq əməllərə son qoymağa dəvət edirəm. Belə iyrənclikləri ortaya atanları olmayan vicdanlarına və Allaha tapşırıram.
Heç bir fakta söykənməyən, əsassız, sifarişli məlumatların mediada yer alması yumşaq desək, jurnalistikamıza xələl gətirir və mən jurnalist dostları belə çirkin kampaniyalara qatılmamağa çağırıram”.
Xatırladaq ki, Criminal.az saytı bir neçə gün əvvəl Qubada yerləşən “Retro” istirahət mərkəzində qətlə yetirilən Könül Zalova haqqında yeni faktların üzə çıxması barədə məlumat yayıb. Məlumata görə, Könül Zalovanın idarə etdiyi avtomobilin seriya nömrəsi tanınmış ailəyə məxsusdur. Könül Zalovaya məxsus ağ rəngli “İnfiniti FX 35” markalı, 10 OD 999 dövlət nömrə nişanlı avtomobilin nömrəsinin İlkin İsmayılovla əlaqəli olduğu iddia edilib. Həmçinin 999 və 888 seriya nömrələri yalnız bu ailəyə məxsus olduğu qeyd edilir.
Kapitan rütbəli İlkin İsmayılov Sumqayıt Şəhər Yol polisində imtahan-qeydiyyat şöbəsinin baş inspektorudur. İlkin İsmayılov Qubadlı-Zəngilan dairəsindən millət vəkili seçilən İmamverdi İsmayılovun oğludur.
Fikirlər
-
Reklam
-
Əsas xəbərlər
