Əli İnsanovun vergi borcunu silib özünü həbsdə saxladılar-anlaşma İDDİALAR
Sabiq nazirin apelyasiya şikayəti təmin edilmədi, vergi borcunun silinməsinə və susqunluğa səbəb nə? 
24-11-202423-11-202422-11-2024
Bakı Apelyasiya Məhkəməsində sabiq səhiyyə naziri Əli İnsanovun barəsində olan həbs-qətimkan tədbirinin artırılması ilə bağlı Qaradağ Rayon Məhkəməsinin qərarından verilmiş apelyasiya şikayətinə baxılıb. Bu barədə Ə.İnsanovun vəkili Toğrul Babayev məlumat verib. Hakim İlqar Murquzovun sədrliyi ilə keçirilən prosesdə araşdırılan şikayət təmin edilməyib. Məhkəmə birinci instansiya məhkəməsinin qərarını qüvvəsində saxlayıb (“Trend”).
Xatırladaq ki, oktyabrın 11-də Ə.İnsanov barəsində Qaradağ Rayon Məhkəməsinin qərarı ilə 3 aylıq həbs-qətimkan tədbiri seçilib. Yanvarın 11-də prokurorluğun təqdimatı ilə Qaradağ Rayon Məhkəməsi Ə.İnsanov barəsində həbs-qətimkan tədbirinin daha 2 ay uzadılması barədə qərar çıxarıb. Qərarla razılaşmayan Ə.İnsanov apelyasiya şikayəti vermişdi.
Qeyd edək ki, avqustun 24-də həbsdə olan sabiq səhiyyə naziri Ə.İnsanov barəsində Cinayət Məcəlləsinin 234.1 (satış məqsədi olmadan qanunsuz olaraq narkotik vasitələri və ya psixotrop maddələri şəxsi istehlak miqdarından artıq miqdarda əldə etmə və ya saxlama), 315.2 (hakimiyyət nümayəndəsinə xidməti vəzifələrini yerinə yetirərkən həyat və sağlamlıq üçün təhlükəli olmayan zor tətbiq etməklə müqavimət göstərmə, xidməti vəzifələrini yerinə yetirməsi ilə əlaqədar ona və ya onun yaxın qohumlarına qarşı belə zor tətbiq etmə və ya zor tətbiq etmə hədəsi ilə hədələmə, bu maddədə göstərilən şəxslərə qarşı həyat və sağlamlıq üçün təhlükəli olan zor tətbiq etmə) və 317-2.1-ci (cəzaçəkmə müəssisələrində və ya istintaq təcridxanalarında saxlanılan şəxs tərəfindən qadağan olunmuş əşyaların hazırlanması, saxlanılması, gəzdirilməsi, daşınması və ya istifadəsi, eyni əməllər təkrar törədildikdə) maddələri ilə cinayət işi başlanıb.
Ə.İnsanov 2005-ci ilin oktyabr ayında həbs edilib. O, dövlət vəsaitlərinin mənimsənilməsində və dövlət aktivlərinin qanunsuz özəlləşdirilməsinin təşkilində ittiham olunub. 2007-ci ilin aprel ayında Ə.İnsanov Bakı Ağır Cinayətlər Məhkəməsinin hökmü ilə əmlakı müsadirə olunmaqla və 3 il ərzində dövlət vəzifəsi tutması qadağan edilməklə, 11 il müddətinə azadlıqdan məhrum edilib.
Ə.İnsanovun şikayətinin təmin edilməməsi Vergilər Nazirliyinin sabiq nazirin 17 min manat vergi borcunun silinməsi ilə bağlı eyni vaxta təsadüf edib. Yanvarın 18-də nazirlik “Vergi ödəyicilərinin 2017-ci ilin 1 yanvar tarixinə mövcud olan vergi borclarının tənzimlənməsi haqqında” Qanunun 1-ci, 2.1-ci və 3-cü maddələrinə əsasən faiz və maliyyə sanksiyaları üzrə 01.01.2017-ci il tarixə mövcud olan borcları qeyd-şərtsiz silinmiş şəxslərin siyahısını açıqlayıb. Vergi borcu silinənlər içərisində eks nazirin də adı var ki, bu da müxtəlif iddialara səbəb olub. Mediada iddialar var ki, bununla iqtidar sabiq nazirə loyal münasibət nümayiş etdirib, hətta Ə.İnsanovun yaxın gələcəkdə azadlığa buraxılacağı və barəsində açılan yeni cinayət işinə xitam veriləcəyi gözlənilir. İddia olunur ki, buna görə də Ə. İnsanov açılan yeni cinayət işinin istintaqı dövründə susmağa üstünlük verib.
Fikirlər
-
Reklam
-
Əsas xəbərlər
