ARB TV-nin efirində yayımlanan "Günə doğru" verilişində parkomatların düzgün quraşdırılmaması barəsində süjet yayımlanıb.

Parkomatlar yollardakı sıxlığı aradan qaldırmaq üçün nəzərdə tutulub. Hazırda paytaxtın inzibati ərazisinə düşən 70-dən artıq küçə və propektlər üzrə 300-dən artıq parkomatlar quraşdırılıb. Bunu yalnız alqışlamaq olar, əmması isə odur ki, bu parkomatlar düzgün yerlərdə quraşdırılmır.

Elməddin Muradlı (ekspert): "Bəzi yerlər var ki, yol polisi orada parklanmanı qadağan edir. Amma Bakı Şəhər İcra Hakimiyyəti gətirib ora parkomat qoyur və sürücülər bundan narazı qalır. Çünki sürücü dayanma-durma nişanına yox, parkinq nişanına baxır və gedib ödənişi edib maşını saxlayır".

Parkomatlar əhalinin sıx yaşadığı və iaşə məkanlarına yaxın yerlərdə müəyyən şərtlərlə quraşdırılmalıdır.

Mütəxəssislər deyir ki, BŞİH parkomatları quraşdırarkən mütləq DYP ilə məsləhətləşməlidir. Yararsız ərazilərdə parkomatların quraşdırılmaması üçün həm də bu işlə məşğul olanların maariflənməsi gərəkdir.

DYP-nin rəsmisi Vaqif Əsədov bizimlə söhbətində bu sahədə çatışmazlıqların olduğunu etiraf etdi və problemi aradan qaldırmaq üçün çalışdıqlarını bildirdi:

"Bəzi ərazilərdə parkomatların sürüşdürülməsi, yerinin dəyişdirilməsi istiqamətində tez-tez əməkdaşlarımız tərəfindən baxış keçirilir. Nöqsanlar olduqda aradan qaldırılması üçün vəsatətlər qaldırılır".

Qeyd edək ki, ötən ilin sonunda prezidentin tapşırığına əsasən Nazirlər Kabineti parklama üçün münasib yerlərin siyahısını hazırlamalı və təhvil verməlidir.

Ekspert Ərşad Hüseynov məsələnin bu siyahının hazırlandıqdan parkomatların düzgün yerlərdə quraşdırılacağına əmindir:

"Nişan qoyulmalıdır. Bunlar həll edilməmiş, bu cür söhbətlərin olacağı qaçılmazdır". Yeni qəbul edilmiş qanunlara görə parklama ərazilərində avtomobillərin səkiyə paralel, perpendikulyar və digər istiqamətlərdə dayanması üçün xüsusi nişanlar yerləşdirilib. Sürücülər diqqətli olmalıdır. Əks halda parkinq pulunu ödəməyiniz belə onları cəzadan xilas etməyəcək.