Ukrayna Ordusu Donbasdakı Avdeyevka şəhərini tərk etməyə məcbur olub. 

Belə ki, Ukrayna Silahlı Qüvvələrinin (AFU) Ali Baş Komandanı Aleksandr Sırski Ukrayna bölmələrinə Donetskdən (DXR) 25 kilometr aralıda yerləşən Avdeyevkadan çıxmağı əmr edib. 

Bu qərar Ukrayna Silahlı Qüvvələrinin bu nöqtədə yerləşən əsgərlərinin mühasirəyə alınması ilə əlaqədar qəbul edilib.

Qeyd edək ki, Avdeyevka strateji cəhətdən mühüm məntəqə hesab olunur. Uzun müddətdir ki, tərəflər bu məntəqəni nəzarətə götürmək üçün əllərindən gələni edirdilər. Lakin göründüyü kimi, mübarizədə Rusiya ordusu istəyinə çatdı. Buna görə də bəzi ekspertlər Avdeyevka uğursuzluğunu Baxmutdakı məğlubiyyətlə də müqayisə edirlər. 

Digər tərəfdən, nəzərə almalıyıq ki, Sırski ötən həftə Ukrayna Ordusunun Baş Komandanı təyin olunub. Yeni sərkərdənin ilk günlərdən belə bir strateji məğlubiyyətlə üzləşməsi isə heç şübhəsiz, ciddi nəticələr doğuracaq. 

Mövzu ilə bağlı Bizim.Media-ya açıqlamasında hərbi ekspert Ramil Məmmədli bildirir ki, Avdeyevkanın itirilməsi Ukrayna hakimiyyətinə böyük zərbə vuracaq: 

“Strateji baxımdan Avdeyevkanın əhəmkiyyəti çox böyük olmasa da, Ukrayna cəmiyyəti və hərbi strukturunda bu şəhərin itirilməsi Baxmut kimi olduqca böyük zərbədir. Rusiyanın əsas məqsədi ələ keçirdiyi əraziləri tək hərbi nöqteyi-nəzərdən yox, həm də Ukrayna cəmiyyətinə dəyən böyük zərbə kimi dəyərləndirməkdir. Daha doğrusu, Rusiya Ukrayna cəbhəsində əldə olunan uğurlarla bu ölkənin Prezidenti Zelenskinin hakimiyyətinin laxlanmasına çalışır. 
Hesab edirəm ki, Avdeyevkanın itirilməsi Ukrayna hakimiyyəti üçün böyük zərbə olacaq. Məhz bu amil 2024-cü ildə Ukrayna siyasi hakimiyyətində də özünü göstərəcək. 

Məsələyə hərbi taktiki tərəfdən baxsaq, Avdeyevkanın əhəmiyyətli məntəqə olduğunu görərik. Rusiya bu il orduda şəxsi heyətin sayını artırmağa çalışır. Qeyri-rəsmi məlumatlara görə, 1,5 milyona yaxın canlı qüvvənin Ukrayna cəbhəsində yerləşdirilməsi  və onların hesabına Xerson, Odessa və Xarkov istiqamətlərində sürətli hərbi əməliyyatlar nəzərdə tutulub”. 

Bu əsasda da həmsöhbətimizin fikrincə, yaz kampaniyası Rusiya üçün daha uğurlu olacaq:

“Baxmut və Avdeyevkanın itirilməsi ondan xəbər verir ki, Ukrayna əlindəki ərazilərin müdafiəsini normal təmin edə bilməyib”.

R.Məmmədli qeyd edib ki, mövcud vəziyyət Ukrayna ordusu daxilində ciddi fikir ayrılığı yaradacaq:

“Avdeyevkanın itirilməsi rəsmi Kiyev üçün ciddi problemlərin başlanğıcı olacaq. Bu şəhər təkcə bir məntəqə olaraq deyil, həm də siyasi amil olaraq ölkə daxilində qarşıdurmaların baş qaldırmasına təkan verəcək”.