Koreya və Azərbaycan arasında diplomatik münasibətlərin qurulmasının 25 illik yubileyi çərçivəsində Bakı Dövlət Universitetində “Bakı K-pop festivalı”ı keçirilib. 

 Koreyanın Azərbaycandakı səfirliyinin təşkilatçılığı, Bakı Dövlət Universiteti və Azərbaycandakı Koreyasevərlər Assosiasiyasının (HANSAMO Azerbaijan) dəstəyi ilə keçirilən festivalı BDU-nun rektoru, akademik Abel Məhərrəmov açıb. Koreya universitetləri ilə əməkdaşlıq əlaqələrindən, BDU-da Koreya dili və ədəbiyyatının tədrisindən danışan rektor ötən müddətdə reallaşan uğurlu layihələrdən, o cümlədən  “Bakı K-pop festivalı”ından bəhs edib.

Koreyanın ölkəmizdəki səfiri Kim Çanq-gyu festival haqqında məlumat verib. Bildirib ki, Bakı K-pop festivalında ifa etmək istəyən şəxslər Koreya səfirliyinə müraciət edib, ilkin dəyərləndirilmədən sonra 12 komanda seçilərək müsabiqəyə qoşulmaq hüququ qazanıb. Festivalın keçirilməsi üçün yaratdığı şəraitə görə Bakı Dövlət Universitetinin rəhbərliyinə minnətdarlıq edən səfir Kim Çanq-gyu “Koreya Respublikası ilə Azərbaycan Respublikası arasında əlaqələrin inkişaf etdirilməsinə verdiyi töhfəyə görə” rektor, akademik Abel Məhərrəmova səfirliyin təşəkkürnaməsini təqdim edib.

Rektor Abel Məhərrəmov, öz növbəsində, BDU-nun xatirə hədiyyəsini səfir Kim Çanq-gyuya təqdim edib.

Sonra festival öz işinə başlayıb. Münsiflər heyətinin qərarına əsasən qaliblərə və iştirakçılara mükafatlar, diplomlar təqdim edilib. Qalib komanda isə Koreyada keçiriləcək 2017-ci il Dünya K-pop festivalına iştirak hüququ qazanıb.

AzerTaym.az